Semina mo le filifilia o se tamaitai e avea ma Miss Samoa Australia 2009

Ua faalauiloa mai nei le faia o se semina (workshop) poo se faatalatalanoaga mo le faamalamalamaina o mataupu uma e fia silafia e le paia ma le mamalu o Samoa, aemaise alo tamaitai Samoa, o loo afifio ma alaala i le setete o NSW Ausetalia poo le aai o Sini e uiga i le sailia o se Lalelei o Samoa i Ausetalia nei poo le Miss Samoa Australia mo le agai atu i tauvaga o le Miss Samoa lea e faia i Samoa i le vaitau o le Teuila 2009 o lenei tausaga.
O lea faamoemoe o le a faia i le Aso Toonai, 30 Me 2009 i le itula e 11 i le taeao i le potu fono o le Colonial Motel, 20 Queen Street, Campbelltown, e pei ona faailoa mai e le sui sooupu o lea faalapotopotoga o Eseta Frost. Saunoa Frost, ua mafai ona auai mai ma malaga faapitoa mai le aai o Perisipeni i Kuiniselani le faatonu ma le Komiti Faafoe o le Miss Samoa Australia latou te faatautaia lenei faatalatalanoaga, poo le semina.
E taua tele lenei vaega o le a faia, aua le silafia e matua ma alo teine talavou o le a ofi atu i totonu o lenei tauvaga tele a Ausetalia lava latou ia i faalapotopotoga a Samoa. Na gata mai le auina atu o nisi o tamaitai lalelei a Samoa mai le aai o Sini i le tausaga e 2005 lea faatinoina e le Aao of Hope ma molimoli ai le latou meaalofa i le falemai o tamaiti i Samoa.