O aafiaga o le soifua maloloina i ni gasegase e fesootai ma aafiaga o le fatu ma fatugao sa faavae ai se finauga malosi a le alii loia o Simativa Perese, i le Faamasinoga Maualuga i Samoa, e avea ma vaega tāua e silasila i ai le faamasinoga i le iloiloina o se faaiuga talafeagai mo le alii loia o Semi Samau.
O lipoti mai fomai i Niu Sila sa vaaia aafiaga o lē ua molia sa tuuina atu e fai ma mau malolosi sa finauina ai se isi faasalaga e ese mai le nofosala i le falepuipui.
Sa tuuina atu foi e le alii loia se vaega o le faaiuga a le alii faamasino o Vui Clarence Nelson na faavae ai sana faaiuga i moliaga o le gaoi a o avea ma tagata faigaluega sa faamaonia faasaga i se tasi o tagata faigaluega sinia a le Malo, lea sa faasalaina ai i se sala tupe e $6,000 ae lē falepuipui ona o aafiaga o le gasegase o le gugu.
Sa faaalia e le alii faamasino Vui i lea faaiuga faasaga ia Sio Fepuleai, e fai si faigata o tulaga o falepuipui i Tafaigat ma Vaiaata, ma e lē maua ai se fesoasoani mo aafiaga o Sio Fepuleai mai lona gasegase.
O le isi foi mafuaaga o lea faaiuga ona sa faatāua le 40 tausaga o le auaunaga a Fepuleai i le Malo.
Peitai i le silasila a le faamasinoga i moliaga o Semi Samau, e eseese ma moliaga o Sio Fepuleai.
Faaalia e le alii faamasino o Justice Pierre Slicer, o le gaioiga na faatinoina e Samau i le faia o le solitulafono e matuā ogaoga lava.
O lona ioeina foi o lona toe totogiina o nisi o vaegatupe sa aafia mai le $143,000 na toesea a le Faletupe o Atina‘e, o se mau manino lea o lona faia o ni auala e faafoliga ai sa iai se sese i le faatinoga o galuega, ae o le mea mautinoa sa natia ai lona faia o se solitulafono matuiā e aafia ai tupe ma faamaumauga tau tupe a le faletupe.
I le silasila a le faamasinoga o se tulaga matuiā tele lea aemaise o ia foi o se loia sa tatau ona ia tausisia taiala o lana galuega e siitia maualuga ai pea le mamalu ma le maualuga o le agavaa sa umia o se loia ina ia faaaloalogia ai pea lea tofiga i le silasila ma le vaai a tagata lautele.
E 10 moliaga ua faamaonia o Semi Samau ae lē fitu e pei ona sa lipotia muamua.
O moliaga uma ia e fesootai ma le toesea o seleni ma le faaseseina o faamaumauga tau tupe e mafua mai i le faatauina o nisi o eleele o aseta a le Faletupe o Atina‘e o Samoa i le va o le tausaga e 1999 ma le 2002 e oo i le 2003.
O ia fanua o ni meatotino a nisi o tagata sa faamatuu atu i le faletupe e faapaleni ai a latou nonogatupe ua lē mafai ona ausia aiaiga ma tuutuuga o le toe totogiina.
I moliaga e sefulu ua faamaonia e 5 tausaga le tuufaatasiga o masina uma mo moliaga taitasi.
O le aso 26 o Oketopa 2010 na amata nofo taofia ai Semi Samau e faatali ai le faaiuga, ae o le Aso Faraile na tea nei, 12 Novema 2010 na faato‘ā lauina ai le faasalaga.
O lona uiga o le aso 26 o Oketopa na amata tuli mai ai lona faasalaga e 5 tausaga.
