O se tasi o alo o le atunuu sa faitauina ma faamoemoe e ono tulai mai o se isi siamupini i le taaloga o fusuaga poo faipelega, ua lē taunuu ma ua lē tau lau o le taumafai.
E lē gata i le taaloga o fusuaga, peitai sa maoae foi lona tomai ma le malosi i le isi foi faagatama o le alo vaa.
Sa leai se faamoemoe o se taimi ma se aso faapea o le a oo mai, ma faamuta ai lona taumafai a o iai i le tuosoosoga o lona malosi ma le talavou o le soifua. Ae ui i lea, ua ia fiafia ma lotomalie e tauave ma talia le tulaga pagatia ma le faigata ua la fetaiai nei, ma ua oo i ai lona soifua.
O le susuga ia Peter Williams, ua suafa matai ia Samalai mai lona afioaga i Salani Falealili.
O Peter Williams, sa amata mai lona soifua taalo i le taaloga o alogavaa, ina ua faato‘ā sefululima ona tausaga. Sa iloga lona tulai mai i lena vaitaimi ma faitauina ai o se tagata agavaa ma le tele o taleni sa vaaia ai ona o lona faatinoina ma gaioiga mo isi foi taleni.
O le tamā o lona tina, le tofa ia Pao Pinati Williams, sa fai ma faataitaiga i lona olaga, ma sa tele ni luitau sa ia a‘oa‘oina mai ai e pei ona ta‘ua e Peter.
O lona soifuaga i Samoa, o se tagata e fiafia tele i tu ma aga a le atunuu, aemaise ai lona taumafai e faailoa lona tupuaga ma lona atunuu na fanau ai.
O le tausaga e 1994, sa ia auai i se tuugavaa sa faia i Samoa a le Men World Junior, ma sa manuia ma siamipini ai a o ia tauavea le fu‘a a Samoa i lea foi faagatama.
O le 2002, sa ia toe tauva ai foi faatasi ma le team a le Pineula a Niu Sila, i le Open Tahiti, ma sa toe manumalo ai foi mo le fu‘a a Niu Sila.
O le sefululima o ona tausaga sa malaga mai ai i Niu Sila, ma sosoo ai pea lava lona fiafia i ana taaloga ma taleni i lena vaitaimi.
O lona faamoemoe foi lea na malaga mai ai i Niu Sila, ona sa ia manao e faalautele ma toe faaleleia atili ana taleni e tautua ai ma faailoa ai lona atunuu i fafo ma le lalolagi atoa.
O le kalapu alovaa a le susuga ia Papalii James o se tasi foi o tamalii o le atunuu sa ia faafoeina ma taitaia lea taaloga i Aukilani sa iai faatasi ma Peter Williams.
Sa sologa lelei ma manuia taumafaiga uma i le taaloga o alogavaa, mulimuli ane sa iai pea lona lagona ma lona manao ina ia faataunuu se moemitiga sa iai, o le fia taalo i faipelega poo fusuaga.
Fusuaga/Faipelega
Na amata lona taumafai mo fusuaga, ma sa faapea foi ona agai i luma ma vaaia ai o se tagata e matuā faigata tele ona faatoilalo e se isi ona o lona faatinoina o le taaloga. O le 1998, sa ia taalo ai loa mo Samoa i taaloga a Malo o le Taupulega, le Commonwealth Games sa faia i Kuala Lumpur.
O le tausaga e 2000, sa toe taalo ai i se tasi o ana fusuaga ma sa aafia ai loa i se manu‘a i totonu e lei iloa i le taimi tonu sa tupu ai.
O le agai mai pea i le lumanai, sa ia lagona ai se tiga i lona ulu, ma o se tiga e uigaese talu mai lona soifua, ma sa amata ai loa ona sailiili atili mo se fofo e tau foia ai le faafitauli.
Manu‘a i le taaloga o fusuaga ma ona aafiaga
E lei taugamalie ma talia gofie foi le tulaga sa alia‘e mai ina ua mae‘a ona faia se suesuega faapitoa, talu ai ua aafia ma ua afaina lona fai‘ai se‘i tulou, ma ua oo i se tulaga ua faigata ona foia ma togafitia. O le iuga lea na maua i le suesuega faapitoa sa faia, o le mafuaaga foi lea o le tiga pea o lona ulu e pei ona faailoa e fomai i lena vaitaimi.
E ui i lea, mulimuli ane sa taumafai pea ni togafitiga ma e tusa ai ma se lipoti a fomai i lena vaitaimi, sa ta‘ua ai e ono iai se faaletonu ma e leiloa foi pe tua ma ni ā togafitiga.
O le vai ma le magalo sa taumate e fomai, ona o le tulaga tuga sa oo i ai le manu‘a ma ua faaauau pea ona vave le faalauteleina.
O le faaiuga o le togafitiga a fomai, sa toe maua ai lona soifua ma toe tu mai le tuugamau e tusa ai ma se faamatalaga sa tuuina mai e lona toalua. Mulimuli ane e ui ina ua toe faafoi mai lona malosi, peitai ua lē mafai ona maua atoatoa le tulaga masani sa iai, ma e oo mai lava i le asō ua ia faaaogāina le nofoa faataavalevale, atoa ai ma le lē toe mafai ona faaleoina ona manaoga.
Ua lē gata ina faamutaina lona soifua taalo i alogavaa, ae faapea ma le taaloga o fusuaga. Ua manuia nisi o togafitiga sa feagai ai ma ia, peitai ua lē mafai lava ona toe atoatoa lona malosi.
E lē gata i le malosi e tulai ma gaioi, ae faapea foi lona malosi i lona mafaufau, ma ua lē mafai ai ona gagana se‘i vaganā ai lana vaai ma lana faalogo o loo manino pea ma e malamalama lelei foi mo fesootaiga.
Ua valu nei tausaga talu ona iai pea i le tulaga pagatia, o le valu foi lea o tausaga talu ona mafuta ma le tamaitai o Charmeyne lana manamea o loo la mafuta pea. E aafia Peter i le faalavelave, ae faato‘ā tai valu masina o lana masaga teine, ma o se tulaga faigata tele lea mo ia ma le tulaga ua na oo i ai.
O tausaga e valu talu ona nofo o ia i le nofoa faataavalevale, o tausaga foi ia ma le matutuaa ua oo i ai lana masaga teine, le tamaitai o Leata ma Sa Fenunuivao.
O le susuga ia Williams, sa mafuta ma le tamaitai o Charmeyne Te-Nana i se mafutaga faaleuo ma le la masaga teine e pei ona ta‘ua. Peitai ina ua tupu lea faaletonu, e lei fesiligia le mafutaga a Peter ma lana uo tamaitai, ona o le tulaga ua oo i ai lona tagata. O le vaai foi faaletagata ua o se mafutaga e foliga ua leai se faamoemoe, aemaise lava o loo iai uma i laua i le talavou o le soifuaga.
O le a e silasila i le molimau matagofie a Charmeyne Te-Nana-Williams, o le toalua o Peter i le vaiaso fou. O se molimau ola ma le matautia pe a e faitauina ona o le matautia o le alofa moni ma lona taunuuga sa iai i lena vaitaimi, ua tusa lea ma le valu tausaga talu ona ma‘i ma gasegase Samalai Peter Williams e oo mai i le asō.
E iai foi ma nisi vaega matagofie sa faailoa ai le mana silisili ese o le Atua i le mafutaga lava a lenei aiga. Ae lē gata i lea o le manuia ua oo i ai i le tulaga o tamaoaiga, ma ua lē gata i Niu Sila nei, ae faapea foi ma Samoa, ae ua iai foi le faamoemoe o le a oo atu ia fesoasoani mo isi atunuu o le Pasefika.
Aua ne‘i misia le vaiaso fou mo le faaiuina o lenei tala ma lona a‘oa‘oga aogā ma le tēua mo i tatou.
