Selesele le tamaoaiga i tuamaota ma tualaoa

O le soifuaga nei ua fai si taugata, e saili gata se seleni e tausi ai aiga, ae o le faatino ma toe faamanatu o galuega masani na soifua ma ola a‘e ai i Samoa, e lē tau fesiligia nei tamaoaiga o loo i ou lava aao ma o tatou lima.
O le susuga ia Sinamoga Toilolo Tiatia Faletuai (Taga Savaii) ma le toalua ia Faitele (Nofoaalii & Faiaai) ma le fanau e toaono ua atoa le tausaga ma masina e lē toe faatauina ni talo mo latou taumafataga e oo foi i fualaau‘aina. Ua tele ina tufa atu faaeleelega a lenei tamā talavou i ona tuaoi, ua faatau atu foi i nisi fua o lona faatoaga i aiga i se tau taugofie.
O le susuga ia Sinamoga e maitauina e le toatele o lenei alalafaga le galue malosi a o iai i Samoa e lē gata o lafu povi, moa ma puaa.
E le faatusaina foi se isi o le nuu e mafai ona ia amoina se fia selau popo ma talo mai le faatoaga agai ane i lona fale e pei o lenei alii, lea foi la ua oo mai i nei atunuu e tumau pea lona fiafia e faamanatu ana galuega masani.
E lei leva ona taunuu mai i Niu Sila le aiga ae ua faasolo ina manuia ma tele le seleni ua sefeina e ala i le galue malosi. E tele foi nisi o le atunuu i Brisbane o loo faia pea lenei galuega o le totō o fua o faatoaga, o se vaega sili ona tāua pe a fua atu i le taugata o le soifuaga i nei vaitaimi.
E momoli foi le faafetai i le aufaifaatoaga a Aukilani o loo faasoa mai pea ma faailoa mai fua o a outou faaeleleega i vaiaso uma, o se lu‘i foi lea i tagata uma e atia‘e le tele o seleni ma le tamaoaiga o loo i tuamaota ma tualaoa.