E fā itula e malaga mai ai i le vaalele mai le aai o Perth i le aai o Melepone, atonu e tai tutusa ma le malaga mai Samoa i Aukilani.
Masalo o le ala lea o le faalētoatele o le paia ma le mamalu o le atunuu o alala ma papaaao ai i lea vaega o Ausetalia, e ui ina logologoā tala i le totogi lelei o le au eli maina. Ae ui i ia tulaga, o loo iai lava nai Samoa ua aumau ma sailimalo ai ma faaigoa Perth o lo latou aai faapelepele.
I nai vaiaso ua tuanai atu na fesootai mai ai le faafeagaiga taulagi o le EFKS i Perth le susuga ia Rev Konelio Tali i le ofisa o la tatou pepa mo se fesoasoani e faalauiloa ai lo latou faamoemoe saili seleni ane i le aai o Melepone.
Na fesootai le sui o le Samoa Times i Melepone ma le faafeagaiga, ma amata faasalalau ai i leitio mo le logopuialiiina o le atunuu aemaise o tauaiga ma uo a sui o le ekalesia. Na saunoa le faafeagaiga e toagaogao le ekalesia toe lima vaivai, e faalētoatele foi ni Samoa i Perth, o le ala lea o le a o latou savalia ai ala o le mativa ma saili seleni ane i le aai malosi o Melepone.
O le Aso Toonai aso 25 o le masina nei o le a faataunuuina ai lo latou faamoemoe, i le falesa o le toeaina o Rev Viliamu Finau i le pitonuu o Dandenong, o le auga o aute o le faamoemoe e mo se fale o le galuega.
