Faasoa lana taleni mo fanau a le atunuu

O le fuata ma lona lou, o le aso foi ma le mea e tupu ai. O le alo iloga o le atunuu le afioga ia Toaletai David Tua, ua iloga lona suafa i le lalolagi i le taaloga o faipelega, ua ia saunia nei se polokalame e faasoa atu ai le meaalofa ma le taleni sa tuuina i ai e le Atua, mo fanau o le atunuu aemaise lava i fanau Pasefika.

O lea faamoemoe ua silasila mamao i ai mo le faaaogāina o fanau aemaise ai o le naunau e faasoa atu lona iloa ma lona tomai i fanau. Ua ia tapena ai ni vasega mo fanau mai le Aso Gafua e oo i le Aso Faraile. E leai se totogi ae cold coins, e amata mai i le 4 i le afiafi seia oo i le 8 i le po.

O ia vasega o le taumafai ia koleni tamaiti ia lava lelei le malosi o le tino, e ala i le tamoe, tu‘i le polotu‘i faatasi ai ma le aoaoina foi o le amio.

Ua mafai foi ona iai ma fomai, auā lava le siakiina o le soifua maloloina, e pei o nisi o tamalii o le atunuu le susuga ia Dr Neru Leavasa ma Dr Monica Liva, ua iai foi ma le fomai e fofoina maso o le tino ma ponaivi (tulou).

E lē gata i lea o nisi o a latou auaunaga e pei o le Doctor and Nurse lead Centre, Counsellors, Smoke-free Support Workers, Domestic Violence Advisors, Restorative Justice Facilitators, Justice of the Peace, Budget Advice, Social Support workers, Arthritis Educators, Diabetes Support, o nei vaega uma ua mafai ona galulue faatasi ona o le naunautaiga lava ia paleni mea uma i totonu o lenei tautua mo le atunuu aemaise o le Pasefika. Ua mafai foi ona ofoina le siaki fua i le fomai mo le 12 masina.

  Ae na saunoa le afioga ia Toaletai, o se mea ua tuuina e le Atua i lona loto o le toe faasoa lea o lana meaalofa ma le taleni mo fanau, ae lē gata i lea na malaga mai i Samoa e leai ni mea e maua ae o lona talitonuga o mea ua foai mai e le Atua e toe tufa atu mo tagata.

Ua tatala manuia o le Atua mo ia ma lona aiga, ua iai le fale koleni, ua tapeina foi ma vaega uma e galulue faatasi auā lava le faatinoina o lana tautua mo le atunuu.

Tele polokalame eseese o loo ofoina ai le auaunaga a le afioga a Toaletai ma nisi o loo latou galulue faatasi