O lea ua amata le vaiaso lona lua e lei maua lava se suavai i ofisa o loo i totonu o le Maota o le Metotisi le Wesley Arcade.
O se faafitauli na laga ai le faagaulemalie o nisi o le aufaipisinisi o loo mautotogi ai a latou atinae i lea fale tele.
O le fale otiulu faapea le fale‘aiga atinae aupito sili ona lē fiafia i lenei tulaga ona o le taumafai e aumai vai i paelo i le taimi lenei.
O le tele o isi ofisa e aofia ai ofisa loia, ofisa o femalagaaiga, o ofisa o nonogatupe ma fale suisui, ona pau lava le latou faaseā ona o le lē maua o se suavai mamā aemaise o le lē toe tatala ai o fale lē ta‘ua ona o lenei faafitauli.
Sa iai nisi na faapea mai ua mafua lea tulaga ona ua motusia e le ofisa o le suavai poo SWA le vai e agai mai i lenei maota tele, peitai na ta‘ua e le susuga i le faafeagaiga, o Rev Faavevela Gafo, o le taimi lenei ua telē se faaletonu i le pamu o le tane lea e agai mai ai le suavai maua i le tele o nei ofisa ma e lei motusia lea auaunaga ona o pili lē totogia e pei ona tuua‘ia ai le ofisa o le Ekalesia Metotisi e nisi o faipisinisi nei.
Faaalia e Rev Faavevela, o le faafitauli tele lava o le itu lea, ua tuai lava le tane apa lea e tautuaina le suavai maua i lenei itu o le taulaga ae ua iai nei ni tanevai uga ua faapea ona faatau mai e le Ekalesia e sui ai tane apa nei ma le faamoemoe e mae‘a le vaiaso lenei ua maua le suavai i nei nofoaga.
Na fesiligia pe faamata la e sau ai i lalo le tau o le rent poo le lisi o le masina na tea nei ona o lenei faaletonu i le auaunaga a le Metotisi ae leai se faamatalaga mai i le alii o loo faauluulu i ai le vaaiga o ia nofoaga.
Ua iai fuafuaga a le Ekalesia e toe faafou atoa lenei nofoaga ua tele tausaga o faaaogā e ofisa eseese ae o le taimi lenei e lei faamautu poo afea e faatino ai lea tulaga.
Ta‘ua e le susuga Faavevela o le suiga lea faatoa faamautu mai lava i le Failautusi Aoao o le Ekalesia, ae ona pau le faamuamua o loo ave e le latou ofisa i le taimi lenei, o le itu lea e toe faaleleia nofoaga ua faaleagaina i le taimi lenei.
O loo faagasolo le tele o galuega e toe faaleleia ai le tele o nofoaga o le Wesley Arcade na faaleagaina i le afā o Eveni. O le lisi poo le rent o loo totogi e le toatele i lenei nofoaga e amata mai lava i le $200 (tala Samoa) i le $650.
O se fua ua ave lava i le tetele o potu o loo faaaogā e ofisa eseese aemaise o le itu tau i fale lē ta‘ua auā o le tele o ofisa ia e laiti tupe o loo totogi atu i le Ekalesia e faasoa fale ta‘ele se‘i vaganā ai i latou o loo maualuga atu a latou tupe o totogi i lea nofoaga o loo iai lava fale lē ta‘ua i totonu o o latou ofisa.
O le tasi la lea o faafitauli ua feagai nei ma le tele o ofisa o loo faasoa o latou lava fale ta‘ele ona o lea ua tapunia talu ona lē maua se suavai i lea nofoaga.
Ua faatalitali foi la i latou e faatutu atinae i lea nofoaga i le taimi e toe sua atu ai le vai i o latou ofisa eseese.
