Ua autasi nei le Komiti o le Tutoatasi a Sini 2015 e malaga mai le faaili iloga mai Niu Sila le Tepatasi Band e faafiafia i le Siva o le Tutoatasi o lenei tausaga (independence ball) e faia lea i le Aso Toonai 13 Iuni i le Trotting Club, 178 Eldridge Rd, Bankstown i le itula fitu i le afiafi.
O tausaga taitasi e faafiafia ai lava tama fanau a Samoa i Sini ae peitai o le tausaga nei ua filifilia lenei faaili iloga mai Aukilani talu ai le mataina o a latou siufofoga ma meafaili i le taimi na uluai masii mai ai i le masina o Tesema 2014 na faafiafia ai i le faalauiloaina o le CD Kerisimasi a le afioga a Tui Eddie Taualapini, ‘E Manatua Pea Oe’.
I lea po na faalogoina ai le mataina o a latou pese Samoa ma suifefiloi lea na seetia ai le tupulaga talavou faapea foi tamā ma tina matutua ua leva faatoa toe faalogo lea i nisi o fatuga tuai ma le malu. O pese o lenei CD faapea le Tepatasi Band o loo faafofoga pea i ai le paia ma le mamalu o Samoa i Leitio i Sini nei.
Na saunoa nisi o sui o le Komiti o le Tutoatasi o le taimi muamua lenei ua faafiafia ai se faaili mai Niu Sila i le Ball ae o se vaega tāua e sui ai foi le faafofoga ma fesoasoani e faatosina mai ai i latou e fiafia i lenei faaili e afifio mai e lagolago le faamoemoe.
O sui o le Tepatasi Band o ni tamalii ua iloga foi o latou siufofoga i leitio Samoa ma ua afu foi lo latou tautua ia Samoa mai leitio ma Niusipepa e amata mai lava i Samoa seia oo atu i Niu Sila lea e aumau ai nei.
E aofia ai Kolisi Sumeo, Savea Peseta Al Harrington Lavea, Muagututi‘a Lose H Tominiko, Penani Iuvale ma DJ Cue.
Ua faatauina foi pepa o lenei faamoemoe o le Sisigafu‘a a Sini 2015 i le selau tala i le ulufale e aofia ai taumafataga e tolu, uaina, ‘ava malosi ma vai suamalie.
