O loo faaauau ona vaaia feeseeseaiga i le va o le Kamupani Vaalele o Samoa le Polenisia ma se aufaigaluega mai Tonga lea ua faatautaia nisi o galuega mo femalagaaiga i Samoa.
O le tala lata mai lea, ua sauni nei le Avefu‘a a le atunuu e ave i le tulafono le galulue ai o ni alii inisinia vaalele mai i le kamupani a le Palu Air Service a Tonga ia ua galulue i Samoa.
E aofia ai i lea auaunaga, le faatino e alii inisinia o vaalele mai i Tonga o siaki o soo se vaalele lava a le Ea Niu Sila e taunuu mai i Samoa. O le mea ua tupu, ua maua e le Kamupani a le Polenisia, ua lē gata la ina faatino e inisinia Tonga nei o siaki a le Ea Niu Sila, ae ua faapea foi ona o latou siaki atu ai ma vaalele a le Poly Blue. O le taimi lenei o le Poly Blue o loo iai pea le tuutuuga ma le Polenisia e siaki ai e inisinia a le Polenisia vaalele a lea foi Kamupani Vaalele.
“O le tuutuuga o pepa faigaluega o inisinia nei mai i Tonga, ua na o vaalele lava ma le Kamupani o le Ea Niu Sila latou te tautuaina, afai e sosopo agai i isi kamupani vaalele o lona uiga ua faia faasolitulafono a latou galuega auā e lē o aiaiga lea o le nonofo ma galulue ai i Samoa nei,” o se faaaliga lea a le Alii Pule o le Avefu‘a a le Atunuu, le Afioga Tauā Fatu Tielu.
Ta‘ua e le alii pule o le tulaga lenei e tatau ona fesiligia ai le pulega o le Malaevaalele, o le Ofisa Malaga a Samoa, o Kamupani vaalele e lua auā ua solitulafono le galulue ai i fafo atu o tuutuuga o lo latou iai i Samoa. Ta‘ua e le Alii Pule ua vaavaai nei le Polenisia e ave le mataupu lenei i le Faamasinoga. E telē le aafiaga o le Polenisia i le mafai ai ona faatino e inisinia nei mai i Tonga o galuega o loo faatino e le Polenisia i Samoa.
O lea ua oo foi i tagata faigaluega e to‘a 10 a le Polenisia sa galulue ai i le Malaevaalele Faavaomalo i Faleolo mo le avefu‘a a Samoa. O le lē toe faatinoina e le Polenisia o galuega i le malaevaalele mo le Ea Niu Sila lea la ua agai ai loa tagata faigaluega o le malaevaalele i le konekarate fou lea mai i Tonga.
Faaalia e Tauā Fatu Tielu, e faafetai o lea lava o loo maua galuega a tagata o Samoa i konekarate nei ae ua iai le fuafuaga a le Polenisia e ono vāea foi nisi tagata faigaluega mai i le latou lava kamupani ona ua leai ni galuega e moomia ai le latou auaunaga.
Na tapa se finagalo o le Alii Ofisa Sili o le Pulega o Malaevaalele e faatatau i lenei mataupu i inisinia. O le faamatalaga a le Afioga Pouniu George Hazelman, e moni o loo galulue inisinia Tonga nei i le siaki ai o vaalele a le Ea Niu Sila ma ua faamaonia foi le faia o galuega mo le Poly Blue. “Ae ai lava ni tuutuuga i le va o kamupani vaalele e lua auā o lea ou te iloa o loo service e le Polenisia ma ana inisinia vaalele a le Poly Blue,” o se faaaliga lea a Pouniu.
Faaalia e le alii Pule, e tatau lava ona talanoa tautua uma o loo aafia i lenei mataupu auā e leai se malosiaga a le Pulega o Malaevaalele e taofia ai galuega o loo faatino e inisinia mai i Tonga. Ona pau le latou galuega, na ia ta‘ua, o le ave lea o nofoaga i le kamupani o le Palu Airways mai i Tonga ia e faigaluega ai nei inisinia, e gata ai foi la iinā le latou malosiaga.
“O pisinisi nei e tatau lava ona talanoa latou ma e iai lava le telē o le aiā a le Polenisia e ave ai le mataupu i le Faamasinoga, ae e leai se matou faamatalaga i lea tulaga,” o se faaaliga lea a Pouniu Hazelman.
O le Polenisia o loo faaauau ana faigamalaga i le va o Upolu ma Tutuila ma o inā o loo faaaoga uma ai malaevaalele i Fagalii atoa ai le malaevaalele faavaomalo i Faleolo.
