Sauni le Motor-1 e agai i Samoa

Ua faailoa mai nei e le alii pule o le kamupani faatau taavale a le Motor-1 i Niu Sila, o lea ua sauni nei e malaga atu i Samoa mo le tatalaina o lona lala i Apia. O le fuafuaga a lea kamupani e oo atu i Samoa lana auaunaga, o se miti sa amata ona fafau mai ina ua amata faalauiloa le polokalame a le malo i nai tausaga ua mavae, e toe faatagaina ai taavale mai Niu Sila, poo taavale i le itu taumatau o latou foeuli i le atunuu, ae sa toe faamalosia lea lava manatu, ina ua toe faailoa mai le isi foi fuafuaga, mo le suia o le itu auala e feoai ai taavale i totonu lava o le atunuu.
O le Motor-1 o se tasi o kamupani tele i totonu o Niu Sila o loo latou aumaia sao taavale mai Iapani, ma toe faatau atu i isi foi faletaavale (Car Dealer) faapea ai ma tagata lautele, (wholesaler and retailer). O lenei foi kamupani e ona lava e ni alii papalagi Niu Sila, Mark Lewis ma Mike.
O le Aso Lulu o le vaiaso na tea nei sa toe feiloai ai le Samoa Times ma le alii pule o le kamupani, Mark Lewis mo nisi o fuafuaga aemaise ai le faamautuina o le faamoemoe mo le tatalaina o le lala i Samoa.
E tolu ni vaega sa silasila totoa i ai le kamupani a o lei faamautuina le agai atu mo Samoa, ma e tusa ma le iva masina sa tapena ai ma tuufaatasia le autu mo le masii atu i le atunuu:
Pe faapefea ona penefiti tagata o le atunuu mai le suiga fou ua iai nei, Ia mafai ona fesuiai taavale o loo iai nei foeuli i le itu agavale, ma taavale e itu taumatau foeuli, ae tumau pea le lelei sa iai (quality).
Le ofoina o se auala e aveesea ai taavale tuai o loo iai nei pe afai e toe tuuina ane i totonu (trade in).
O le taimi nei ua mafai e le Motor-1 ona tali ia vaega uma e pei ona taua, ma e talitonu le susuga i le alii pule, o le a fesoasoani tele ia vaega i le tulaga tonu o loo manaomia e tagata Samoa i Samoa ma Niu Sila.
O le isi tulaga sa toe faamanatu mai e Mark i le talanoaga lava lea, ina ia fautuaina le mamalu o le atunuu e aua nei faatauina le taavale i le lanu ma ni vaaiga o loo iai le taavale, a ia faatau ina ua mautinoa o se taavale e anagata ma faatuatuaina, ina ia talafegai ma le seleni o loo faaalu ai.
O le talitonuga o le alii pule, o taavale uma a le Motor-1 ua tuuina atu i Samoa, ua maea ona siaki ma vaaia lelei i itu uma, ma ua iai foi le fuafuaga o le a faatuina ma se auaunaga mo le faaleleia o afi o taavale ma ona puipuiga uma e manaomia (mechanical shop) i le nofoaga lava e tasi, ina ia mautinoa e faaauau pea le va lelei ma tagata faatau e ala i le tausia ma vaaia a latou taavale.