O lea ua pasia e le faigamalo a le National le tulafono lona lua e faavae ai le pulega fou mo Aukilani poo le Super City.
Na faatopetopelau e le faigamalo le faaofiina o lea tulafono i le vaiaso ua te’a, ina ua faaofi le faitauga lona lua o le tulafono i le aso Lua i le ta o le lua i le aoauli, sosoo ai loa ma le amataina o fonotaga i le 9 i le taeao o le aso Lulu seia oo i le vaeluaga o le po, ma toe faaauau ai i le taeao o le aso Tofi seia oo i le leva o le po.
O ia uiga ua atagia ai amioga pulepuletutu a le faigamalo aua o loo ia i latou le fuainumera o le maota fono e mafai ai ona pasia nei tulafono. Sa faapea foi ona faatopelau e le faigamalo le pasia o le tulafono muamua mo le Super City.
Ou te talitonu o nei faiga ua mautinoa ai faiga taufaasese a le Malo i le faalele o faamatalaga faapea o loo faalogo i finagalo o tagata Aukilani ma fia iloa finagalo o tagata lautele, ae mulimuliane e faia lava le mea ua latou loto iai e aunoa ma se popole pe amanaiaina o finagalo sa faaalia e tagata lautele.
Ou te talitonu o le faavae fou o le Super City o le a afaina ai tu faatemokarasi e pei ona masani ai pulega o faigamalo laiti i Niu Sila. Ua sui le tulafono e le Malo ma o le faavae o le Super City i Aukilani, ua faatulaga nei e tasi le Pulenuu e palotaina e tagata uma e aofia ai Franklin, Papakura, Manukau, Aukilani tutonu, Waitakere, North Shore, ma Rodney.
Ua ave le malosiaga i le Pulenuu e na te filifilia ai le sui pulenuu ma taitaifono o soa komiti a le Super City.
Ua faavasega e le tulafono se vaega tupe tele e faaaoga e le Pulenuu fou e na te faafaigaluegaina ni tagata faigaluega e faapitoa i le tautuaina o ia ma le faatinoina o ana faatonuga. Ua tuuina foi i le Pulenuu fou le aiatatau e na te faatulagaina ai tupe faaalu mo galuega faatino a le Super City. O ia malosiaga ose faiga fou lea ua faatulafonoina nei e le Malo a le National. Nao le 20 sui o le pulega fou poo councillors o le a palotaina faaleitumalo, peitai ane e lei faavasegaina poo fea tonu tuaoi o ia itumalo.
O loo faamoemoe e oo atu ia Mati 2010 ua maea galuega a le Komisi Faapitoa o le a galue mo le faavasegaina o tuaoi mo itumalo faigapalota mo le Super City, ma iloa ai pe fia itumalo, ae fia foi councillors a le itumalo.
Ua mautinoa foi i le tulafono o le a iai ni komiti mo aai taitasi poo ni local boards i le va o le 20 – 30 mo Aukilani aoao. E ui o loo iai ni malosiaga i ia komiti mo le faatinoga o galuega ma faaiuga faatatau i aai taitasi e latou te pulea, peitai ane e pule aoao lava le Super City a le Pulenuu ma sui usufono e 20. E le mafai ona gaioi ia komiti seia vagana ua aumai le faatagana mai le Super City.
Ua teena e le Malo le iai oni nofoa faapitoa mo Maori. Sa ou fesiligia pe moni ua latou mulimuli i faiga faailogalanu a le Minisita o Faigamalo laiti ma lana pati o le Act. E leai se tali.
Sa ou taufaaofi le teuteuga o le tulafono ina ia aloaia se Komiti Faufautua a le Pasefika ae teena e le National ma Act ina ua palotaina lea teuteuga. Sa ou fesiligia pe aisea e faapea mai ai e taua tagata Pasefika ao lea latou te le taliaina se komiti a tagata Pasefika e faufautua i le pulega fou? E leai foi se tali a le Malo. Ona ou fai atu lea iai, ua aliali ai ii le vaavaa o le faigamalo a le National ma le Act. Ua latou teena le iai o Maori, Pasefika ma Asia, ona o loo naunau lava nao tagata Papalagi e maua tupe e ofi atu i le pulega fou o Aukilani. Ua iloa ai foi nao le faalele o faamatalaga ma faia a latou faasalalauga faapea e taua ia i latou tagata Pasefika, ae e le moni ia faamatalaga ma oni faiga taufaasese.
Ua manino ai foi uiga masani lava lea a le National aua e moni o le Minisita o Faigamalo Laiti o loo taulamua i lea tulafono, ae o loo lagolago atoatoa iai National ma le Palemia.
E faigata ona faamasino le mea oi le loto o le tagata, ae e mafai ona faamasino upu ma ana galuega faatino.
Ua le o tutusa faamatalaga a le Malo faapea e taua Maori, Pasefika ma Asia, aua a fua i tulafono ua pasia faatopetope mo le Super City, e leai lava se aiaiga e tasi o nei tulafono e iloa ai se latou faatauaina o tatou faapea tatou uso Maori ma Asia. O le mea lea ia mataitu lelei uiga o le National, ae maise pe afai e te fou
mai i Niu Sila.
