E ui o le itupa vaivai e pei ona faaigoa taatele ai, ae ua matua leai se eseesega ma le malosi o alii, ua tau faigata ai foi i nisi taimi ona iloa le eseesega, ona o le malosi ma le fit ua iai nei tamaitai talavou mai Faleu Manono, a o latou tapenapena ai mo le tuuga Tulula i le faailogaina o le 50 tausaga o le Tutoatasi o si o tatou atunuu i le masina o Iuni o lenei tausaga.
O le tamaitai o Tui Masei o loo kapeteniina le latou au alovaa, ma na ia ta‘ua e pei ona faaalia i se pepa o faamatalaga, ua tele vaiaso sosoo o latou toleni pea ma faamalositino foi.
E le gata ina tamomoe, o nisi taimi ua taututuu e unai tagata oneone, ae faapea foi ma le agai i le tulula ma faataitai le aloina.
O nei toleniga e faia i aso taitasi i le taeaopo ma le afiafi. E le o manatu mama Tui ma lana au alovaa i le tausinioga e pei ona tapena atu nei i ai.
E lua tulula o loo sauni Salua Manono e faaulu i lenei tauvaga, le Lavilavi I ma le Lavilavi II.
E oo mai le taimi o lenei lipoti e lei maua mai se tala po ua uma ona fausia nei tulula, peitai o le saunoaga a le taitai tufuga o loo feagai ma le fausiaina o nei tulula, le susuga Rev. Fereti Leiataua, e mautinoa lava e oo atu i le aso o le tuuga ua i le sami uma vaa nei e lua.
O le taimi nei o loo sagai le tufuga mo le fausia o le isi vaa fou o le Telefoni, ona faatoa agai ane ai lea mo le fausia o tulula e lua o le Lavilavi.
O se tasi lenei o tuuga vaa ua leva tausaga e lei toe faatinoina i taimi nei o aso faailogaina o le atunuu.
Na gata lava i tua i se vaitaimi o le 1980s, sa logologoa ai foi le mataina o nei tausinioga i le tai i tulula a tamaitai, aua e na o tina ma tamaitai e latou te aloina na ituaiga o vaa.
Ae o lenei la ua toe a‘e le tofa i le Komiti o le Tutoatasi i lenei tausaga, e toe faaulufale mai le tuuga tulula i tausinioga i le tai i le faamanatuina o le 50 tausaga o le Tutoatasi o Samoa.
E le gata i le tuuga tulula lea o le a nofo faatali uma i ai le tele o le aumaimoa, ae o le a iai foi tuuga paopao, vaaalo, kayak ma vaa faila. E oo mai le taimi o lenei lipoti, e tusa ma le 12 tulula ua uma ona lesitala ane mo lenei tauvaga, ae foliga mai e tele nisi tulula o loo tapena pea ma faailoa le latou fia auai.
E faamuta le lesitalainao tulula e auai i le faaiuga o le masina fou o Me. E manaia foi le taui seleni o le a tauva i ai, e $5000 le faailoga tupe mo le tulula e manumalo.
O le itu e mataina ai lenei tausaga, ona e oo lava i afioaga sa lei masani ai ona tauva i nei tauvaga, e pei o le afioaga o Apia, Mulinuu ma Tanugamanono, ae foliga mai i lipoti, o loo taufai fau uma tululua o tamaitai mai nei afioaaga.
Se faamatalaga mai se tasi o le afioaga o Apia, Pokati Tuiletufuga, na ia ta‘ua ai, ‘e lua o latou tulula o loo fauina i le taimi nei mo le faamoemoe i le Tutoatasi’.
E toatele tamaitai talavou o le afioaaga e taaalo netipolo, kirikiti ma lakapi, lea la ua latou mautinoa ai, e fiu e mafai ona latou aloina foi se tulula ma ono manumalo ai i se faailoga tupe i lea aso.
O le tulula e toaono lana aualo (six rowers) ma le tamaitai e toafitu i ai, o ia o le kapeteni ma o ia foi e taina le apa e fua i ai le alo a teine.
O le tuuga tulula o loo faamoemoe e faia i le Aso Lua, aso 5 o Iuni e tusa ai ma le polokalam. E amata atu i le uafu tele i Matautu, ona agai lea ma toe liuliu mai le ava i Toamua, ma faatini mai luma o le faletalimalo o Aggies i Vaisigano.
