Ua tau lau o le faamoemoe ina ua mae‘a le galuega tele sa feagai ma le faafeagaiga, Pastor Uilisone Taito, faapea le mamalu o le Ekalesia, le Revival Centre, Voice of Christ i Magele, Aukilani i Saute.
O le hall o se tasi o poloketi tele lea a le ekalesia sa fuafua mamao mai, ma o se manaoga sa fau ao, fau po, ona o le faatinoina pea o galuega lelei, ma le fausia o le itu i le tino o le galuega a le Atua.
Ina ua mae‘a ona umia saoloto se tasi o nofoaga tele, o loo faaaogaina nei mo tapuaiga ma fonotaga, e le gata mo le aulotu lava ia i Magele, ae faapea foi fonotaga ma galuega faaevagelia a le Matagaluega a Niu Sila, ma le lalolagi. Ona toe fuafua ai lea o le hall e pei ona mae‘a fausia nei i tafatafa ane o le Malumalu tapuai i totonu lava o le lotoā o loo iai nei i Tidal Rd, i Magele lava.
O se nofoaga tele, e tusa ma le latalata i le 50 mita le umi, i le luasefulu mita lona lautele. O le tau aofai o le galuega e tusa lea ma le $1.2 miliona. Sa fesiligia le susuga i le Faafeagaiga o le aulotu i Magele, le susuga Pastor Uilisone Taito, pe na faapefea ona faatupeina le galuega, ona talu ai o se tupe tele na fausia ai e tusa ma lana saunoaga ina ua feiloai atu i ai.
O le saunoaga a le Faafeagaiga sa ia taua ai e faapea, o le tau aofai lava o le galuega e pei ona taua i luga, o se vaega tupe o loo aitalafu ina ua uma lelei le fausiaina o le fale, e na o le $800,000.
O lea vaega tupe sa latou manatu o le a sili atu, peitai o le feoloolo o nai seleni sa faasaosao a le aulotu, ua faaitiitia ai le aitalafu.
E leai se tupe na faaune mai i faalapotopotoga faaputu tupe e masani ona talosaga i ai mo galuega tetele faapea, aemaise ai o le hall ma le aulotu, o loo lesitala o ni galuega mo le faapotopotoga o tagata lautele.
Sa faatauanau ma talosagaina foi tupe mai le Local Council e pei ona iai a latou fund poo grant, faaagaga mo galuega faapea, ae o le tali ane a le pulega faaitumalo. E malilie ua leai ni tupe a le Council o toe faauneina mo galuega tetele faapea. Sa oo lava foi i le ASB Trust ma isi, na siliga se fesoasoani na maua ane ai. Ae na saunoa le Faafeagaiga, a o tālia ai ni tali mai ia faalapotopotoga i talosaga sa tuuina i ai, e lei nofonofo ai lana aulotu ma faatalitali tini. Ae sa faataunuu pea lo latou tiute o le saili o seleni i auala ma meaalofa sa i o latou lima.
O le BBQ i vaiaso uma, o le alatupe malosi lea sa saili faatasi i ai tagata uma, ae ese mai i le faatinoina o le aao mafola, ma le foai a aiga ma tagata taitoatasi o le lotu, tauala ane i vaega faapitoa ua valaauina ma musuia ai e le Agaga o le Atua.
O le potu malosi lava o galuega faapenei, o le Tatalo ma le Faatuatua pea i le Atua, ma faatino e le tagata auauna lana matafaioi i auala uma o avanoa, ae galue mai le Tama i lana pito laau, aua o Ia lava na te faaatoa ma faaeaina manaoga.
O le hall poo lea nofoaga, e matata eseese lona faaaogaina, ma e le taga tasi ma faapitoa i se mea e tasi, peitai ua tatala le avanoa mo le tele o faamoemoega o le atunuu. E le faapitoa foi mo na o manaoga o le ekalesia, peitai o le agaga o le tautuaina lea o tagata Samoa, ma isi e manaomia lea fesoasoani.
O loo fausia le nofoaga, e talafeagai ma faatatau mo taaloga, e pei o le volipolo (volley ball), basket ball, ma isi lava ituaiga taaloga.
Ua iai foi le laulau piliati mo le faaaogaina i taaloga uma e mafai ona faatino i lea foi ituaiga taaloga.
O le isi itu o le fale, ua faapitoa ma ua mae‘a faatotogaina foi mo kolegi i le itu tau faamalositino (gym).
Ua iai ona totoga, faatulagaina, e pei o uila, o uamea siisii ma le anoano ai o isi tapenaga mo le penefiti o tupulaga ma tagata lautele o le aulotu i le faamalosia o le tino.
O le tasi lea o manaoga o le lotu e pei ona saunoa i ai Pastor Uilisone, ia le gata i le fesoasoani i le agaga o le tagata tapuai, ae e tatau foi ona fesoasoani i le malosi i le tino, ina ia mafai ona faatino ai manaoga uma a o maua le malosi.
O le naunautaiga lea sa i le Fono Faatonu a le ekalesia, sa silasila mamao i tupulaga talavou, ina ia faafeiloaia manaoga i taaloga ma isi, ina ia avea o se auala e taofiofi mai ai tupulaga nai lo le auai i talanoaga ma taupulepulega faalelalolagi e ono aafia ai i tuinanauga leaga.
Tatala le hall mo tagata lautele
Ua iai foi le fuafuaga a le Faafeagaiga ma le Fono Faatonu, ina ia tatala le avanoa mo manaoga ma faamoemoega o tagata lautele. O sauniga ma le faataunuuina o taumafataga o Maliu, Faaipoipoga, Aso Fanau, Faaulufalega ma isi, ua faamatuuina ma tuu avanoa i ai mo le taimi nei.
E mafai ona faaaogaina le Malumalu mo Sauniga, Faaipoipoga, Maliu ma Aso Fanau, ae faaaoga le hall mo taumafataga ma isi fuafuaga pe a manomia.
O loo ua iai foi le auaunaga faapitoa a le aulotu, mo le tapenaina o taumafataga (Catering) mo soo se toatele lava o tagata.
E oo atu i le 600 tagata e mafai ona ofi ma faaaogaina le hall i soo se faamoemoe e pei ona taua.
O loo maua foi le avanoa mo soo se tagata e faaaogaina ai le Gym, poo le falekoleni, ae amata i le $2 agai luga le foai tupe o le lotomalie e totogi.
O fesootaiga uma e tatau ona vave faailoa ane ma taofi avanoa, ina ia faafaigofie ma ia mautinoa vaega uma e manaomia.
O telefoni e mafai ona fesootaia ane ai, o le 09 275 4430, poo le 021 049 1576 mo le susuga ia Uilisone Taito. A o le 021 023 71729, mo le susuga i le Failautusi ia Alatina Fulitusi.
O le susuga ia Pastor Uilisone Taito e mai afioaga o Satuimalufilufi, Saleimoa ma Tuanai, a o lona faletua ia Tepa Taito, o Tafagamanu i Lefaga ma Vailele i Apia, ae o loo tausi aulotu i le Ekalesia a le Revival Centre Voice of Christ i Magele, Aukilani i Saute.
