Ua faalauiloa mai nei paga o le fusuaga tele o le Sisiga Fu‘a 2010 ma o le a taualuga i le fusuaga e sefulu taamilosaga mo le Siamupini o le aupaga mamafa a Samoa, lea o le a lu‘i ai e Junior Pati mai Niu Sila le fusi o loo umia e Seiaute Mailata o loo alala i Samoa.
O Pati e tupuga mai Fasitoo-tai ma Vavau ae o lona olaga fusu atoa o totonu o Niu Sila. Sa manumalo i le Golden Glove a Niu Sila a o taalo amateur ma amata fusu faapolofesa ai loa i le 2004.
Faaalia e Tuilagi Saipele Esera o le pulega a le Event Polynesia o loo faafoeina lenei fusuaga, “O se tulaga lelei lea avanoa ua tatala mai e le Asosi o fusuaga faapolofesa a Samoa e mafai ai e alo ma fanau a Samoa o loo alala ma taaalo i atunuu i fafo ona tauave le igoa o Samoa i fusuaga. I le taimi nei e le o iai se tama fusu i Samoa e talafeagai ona lu‘iina le fusi o loo ia Seiaute.”
O lea tulaga sa faamanino e Tuilagi, “O Seiaute ua luasefulufa ana fusuaga faapolofesa a o tama fusu faaplolofesa i le paga mamafa o loo iai nei i Samoa na o le tai lua pe tai tolu fusuaga ua iai. Tusa pe ua leva ona taalo amateur le tama fusu, e toe amata mai lava i le tasi le fusuaga pe a avea ma tama fusu faapolofesa.”
Faaalia foi e le tofa Ale Vena Ale o le failautusi aoao o fusuaga faapolofesa a Samoa ma le Pasefika e faapea, “O le pito laau a le Asosi e fesiligia ai se siaki a le fomai ma silasila i tausaga o le tama fusu poo toe talafeagai. Tusa lava pe sa lelei lana fusu ae a fai mai le fomai ua iai se aafiaga, pe iai foi se maitau a le Asosi ua leva e lei toe taalo ma ua matua le soifua, ona taofia lea o lea fusuaga mo le puipuia o tama fusu.”
O Junior Pati ua luasefulu ana fusuaga faapolofesa. O lana fusuaga mulimuli i Otara i le Manukau Pro AM Fights i le aso 13 Aperila na manumalo ai i le tu‘i oti ina ua lē mafai ona faaauauina e Junior Iakopo le la fusuaga i le taamilosaga muamua.
Faaalia le fiafia tele o le tamā o Pati, le faafeagaigai ia Tua Pati, a o se tama tuai foi o le maea, ona o lenei avanoa sa lē maua i lona vaitaimi ae o lea ua maua e lona alo.
E lima isi paga faapolofesa o le Samoa Pro AM Fights i le Aso Gafua 31 Me e faia i le faletaalo tele o le Malo i Tuanaimato. I le aupaga welterweight o le a fetaui ai Ionatana Pula ma Tony Iapesa, ae fetaui Michael Fonoti ma Lima Taefu. I le paga o le super middleweight o le a taaalo ai Too Mita‘i ma Alema Vaele.
I le paga light heavyweight o le a fetaui ai Luma Aifaalua ma Farani Tavui. I le paga o le heavyweight o le a taaalo ai Ropeti Vaiti ma Saipeti Asiata.
O le fusuaga tele foi lea o le a puipui ai e le aufusu amateur a Samoa le Ipu a le Palemia lea o le a lu‘iina e le aumasii mai Amerika Samoa. E fitu paga amateur o le a saili i ai le manumalo i le va o aufusu nei a Samoa e lua.
Mo nisi faamatalaga silasila i le upegatafailagi o le www.eventpolynesia.com
