E lei mautu pe fia tonu le aofai o itu o le a suesueina e le faamasinoga o fanua ma suafa i Mulinuu faasaga i le Faafotu Tupu na faaee ai le suafa Tamaaiga o le Mataafa i le afioga Tupuola Lui Iosefo, o se tasi o toe ulutaia o le aiga Sa Mataafa i Samoa.
O le Aso Tofi aso muamua o Tesema na valaauina ai le mataupu ae ua toe tolopo i le Aso Gafua, aso 5 o Tesema 2011 ona e iai se tasi o itu talosaga sa tuuina atu se tusi talosaga e tolopo le mataupu ona ua gasegase le latou taitai ae ua lē maua ese isi e tauaveina.
Sa saunoa le sui Peresitene le afioga Misa e toe tolo le mataupu i le Aso Tofi le aso 8 o Tesema, peitai na talosaga nisi o suli na malaga mai fafo i se finagalo o le faamasinoga ae fofogaina le mataupu i le amataga o le vaiaso, ona o fuafuaga ua uma ona taoto e toe foi i atunuu o loo aumau ai. E ui ina ua taoto le aso ua filifilia ae na tuu aulafo se finagalo o le faamasinoga i le tatalo atu a suli o le suafa na malaga mai fafo. Faaalia e le sui peresitene e lē mafai ona toe toloa le mataupu ona o le suafa Mataafa o se tasi o suafa maualuga o le atunuu ua leva tausaga e lē o toe nofoia. O le faaeeina o le suafa o loo tetee ai nisi o suli o le suafa ona o le latou mau, e lei logoina i latou.
O le itu talosaga a Marina Schaffhausen ma isi o loo talosagaina le faamasinoga mo se poloaiga e faaleaogā ai le faanofoina o Tupuola i le Mataafa, ona o le latou itu o suli moni e faasino ia Mataafa Faasuamaleaui.
O le tasi o itu o le faamasinoga o le itu lea a Uili Uliano, ua latou finauina o latou o suli o Silupevaelelei ma e lei iai so latou maliega i le faaeeina o le suafa i a Tupuola Lui. O le afioga i le Sa‘o-faapito, Fiame Naomi Mataafa le Minisita o Faamasinoga, o se suli foi o le suafa e pei ona sa umia e lona tuaa o Mataafa Fiame Mulinuu II. O loo ia taitaia le itu tetee faasaga i talosaga ua taumafai e toe lepeti le faaiuga na tasi i ai e faaee le suafa i le afioga Tupuola Lui Iosefo.
E iai nisi o itu talosaga na tuuina atu i le faamasinoga i le aso na valaau ai le mataupu, ma ua talia e le faamasinoga. O le itu lea a le susuga i le faifeau o Opapo Soani o se suli foi o le suafa. O le a faato‘ā manino lelei itu uma o le faamasinoga pe a amata ona tagofia le mataupu i le Aso Gafua, 5 o Tesema 2011.
