O se tafaoga i Samoa nei a se alii Pule o le aoga tulagalua ua faaigoaina o le Raumati Beach School i Ueligitone, ua faamautu ai nei se fesootaiga i le va o lana aoga ma le aoga a Savaia i Lefaga, faapea foi le aoga a Saanapu.
O le vaiaso na tea nei na malaga mai ai ni tamaiti aoga o le Raumati Beach School i Samoa.
Ua malaga mai e faamae’a galuega faaletausaga ma tauaao mai se foai ua o latou aumai mo le aoga lea ua o latou manatu i Niu Sila o le a avea ma aoga faauo i Samoa nei, ma o se fesootaiga ua manatu le alii pule o le a taumafai e faaauau pea i tausaga o lumanai.
O le meaalofa na tauaao i lenei uluai feiloaiga a tama ma teine aoga, o pusa o tusi aoga atoa ai ma se togiga o ofu taalo o le lakapi mo se aualakpi a le aoga laitiiti a Savaia.
O maota o le apitaga tu matafaga a se tamaitai Savaia o Betty Jones ma lona toalua lea na afea e le alii pule aoga lenei i sana malaga asiasi mai i Samoa i le faaiuga o le tausaga na tea nei.
O le feiloaiga lea na ta’ua ai e le alii Pule i le ulugalii e ana le Valasi Beach Fales, o ia o loo saili lava poo iai ni aoga i Samoa o loo moomia se fesoasoani e mafai ona ofo mai e lana aoga ma maua ai ma le fesootaiga i le va o tama ma teine aoga i Samoa nei ma Ueligitone.
O le mafuaaga lea o le talosaga o Betty Jones i le alii pule aoga, o Mike Farelly, pe mafai ona fesootai ma le aoga a lona nuu.
“Ou te iloa lelei le tele o mea e manaomia e le fanau aoga a si o matou nuu ma o le ala lea o lo’u taumafai e saili ni avanoa faapenei e auina mai ai ni fesoasoani auā tupulaga lalovaoa o Savaia”.
Faaalia foi e Jones o le a lē gata ai lona saili pea mo nisi fesoasoani mo Savaia, ae o loo ia tauamafai foi e saili se isi e auina mai se fesoasoani o ni masini komepiuta auā le fanau faapea ai ma faiaoga o loo iai i Savaia.
E tusa ma le $10,000 tala Niu Sila le tau aofai o lea fesoasoani, ma o se seleni na ta’ua e le alii faiaoga mai le aoga a Raumati, na saili tupe ai tamaiti uma o la latou aoga ina ia mafai ona faaoo mai la latou fesoasoani mo nai aoga i Samoa o fia maua lea fesoasoani. Ta’ua e le tamaitai pule o le aoga a Savaia, le susuga ia Malama Su’a Malaesilia, lona agaga faafetai i nei Samaria agalelei ua mafai ai ona maua nisi o tusi faitau, api aoga ma le togiga taalo mo nai alo ma fanau o la latou aoga.
E pei ona silafia o le aoga tulagalua a Savaia e na o le to’a 71 alo o lea afioaga o loo aooga ai, ma faiaoga e toatolu lea o loo a’oa’oina nei fanau.
E iai nisi o pusa tusi faitau na faimeaalofa ai foi le aoga lava lea i le aoga tulagalua a le afioaga o Saanapu.
Na faaalia e le alii pule e aoga ai i Raumati Beach Schools se tamaitiiti e mai i Saanapu ae ua nonofo nei ma lona aiga i Ueligitone.
E lua pusa tutumu i tusi aoga na foai atu mo le aoga laitiiti lenei a Saanapu. Ua iai foi le fuafuaga e saili ni masini computers i le isi malaga mai a le aoga lenei mai i Ueligitone.
