E toalua ni tamaitai na taofia i le vaiaso na tea nei e le Ofisa o Leoleo ona o gaoiga ua tuuaia ai le solitulafono. O nei tamaitai na ta‘ua e le alii e suafa ia Veni o le avetaavale na feoai ai, na manatu lava ia o loo feaveai e fai ni a la faatauga ae mulimuli ane tau toso faatasi atu ai Veni ma ia tamaitai i le Ofisa o Leoleo.
Faaalia e lenei alii na tu lana taavale ae oso atu i totonu se tamaitai e i le vaimea o le 30-40 tausaga le matua. “O luma o le faleaiga o Scoops i Matautu-uta na piki mai ai ma fai mai e agai atu i Vaipuna, o inā sa faatali mai ai se tina e i le va o le 40-50 tausaga le matua na feosofi mai ma se pepe o loo ia sii mai,” o se faamatalaga lea a le avetaavale la‘u pasese. Ta‘ua e Veni na muamua lava fai atu tamaitai nei e agai le taavale i le faleoloa o Frankies i Lalovaea ma na agai i ai ae fai atu e faatali atu i fafo.
E lei umi ae ia vaaia loa le agai mai o tina ma faatau ua utu tagapepa ma faapea mai e agai atu ia Farmer Joe le faleoloa o loo faafesagai ma le Maketi o fua o faaeleeleaga i Fugalei. Na talosaga foi e tu le taavale ma na ta‘ua e lenei alii ua te‘i i le vaai atu o loo agai mai i fafo nei tamaitai ae mulimuli mai ai ma le leoleo o le faleoloa.
E lei leva ae vaaia loa leoleo ua agai atu i le nofoaga o loo tutū ai lava nei tamaitai ma le leoleo o le faleoloa ma nisi o le aufaigaluega a le Farmer Joe. Faato‘ā iloa mulimuli ane e Veni o nei tina ua na ona agai atu lava i totonu o faleoloa nei ma ao mai tagapepa faatau a tagata ua tuu i luma ane o fata o loo iai faatau oloa ma le manatu o faatauoloa o ni tina o loo agai faatasi atu ma tagata e ana faatau.
Na alu ai lava ma lea alii i le afiafi na tulai mai ai lenei faiga ma ave ai ma faatau i tagapepa ia na avatu i le faleoloa muamua na agai i ai. O le faamatalaga a Leaupepe Fatu Pula le sui sooupu o le Matagaluega o Leoleo, e fou foi ia ituaiga gaoiga ma ua vaavaai nei leoleo i le mataupu e suesue ai po ua leva ona faia e nei tamaitai ia solitulafono.
O le tele lava lea o solitulafono ua aliae mai i lenei vaitau o le au taufaavalea ae sa mātele la i le faatautaiga o pepa malaga o tagata e fia saili nofomau ma avanoa e malaga ai i Niu Sila poo nisi vaega o le lalolagi. O isi taufaavalea ua vaaia ai le agai sa‘o i aiga ma ua saili tupe ai ae ua faaaogā ai igoa o aulotu ma nuu.
O le isi taufaavalea tele lea ua iai o le saili o ietoga e ala i le talaga o gafa o aiga ma le taumafai e faaaogā suafa o tagata o se aiga e maua ai ie o le malo.
O le isi auala ua saili tupe ai nisi ua faaaogā ai aulotu o loo saili faifeau. Ua lua lipoti ua maua ai le agai o ni matai i nisi o aiga o loo iai fanau faifeau, ma ta‘u i ai o latou suafa i ni faiga filifiliga a aulotu o loo fai ma o le tele o taimi e agai i ai ma faapea o latou o sui o aulotu nei o loo filifili mo se alo faasino i ia aiga.
E tele lava la ina maua ai seleni pe ta‘i ai lava sua e nisi o aiga ona o le naunau ia maua e fanau galuega poo le valaauina i nei galuega ae mulimuli ane maua faamatalaga e lei iloa lava e le aulotu lea faifeau poo se a‘oa‘o foi.
Ae e pei lava ona ta‘ua e Leoleo e lelei lava le fai o nei taufaavalea ae e lē maua ma e tatau lava foi i tagata uma ona mataala i le mau taufaavalea ua vaaia nei i le atunuu. Ia logo vave foi leoleo pe a masalomia se tagata ua faia taufaavalea nei.
O loo tālia le tulai o nei tamaitai i lenei vaiaso ona o si a la ata lea na fai i le vaiaso na tea nei ae o Veni le molimau malosi a leoleo i lea mataupu.
