E ui ina sa tele ni fesoasoani sa ofoina e le aoga a le Polyethnic i Otara e uiga i le tulaga tau a’oa’oga mo ana paaga ma i latou sa faaaogāina lea tautua aoga, peitai sa vaavaai pea ma tulimatai poo afea e faataunuuina ai se tasi o moemitiga, e ala i se talosaga sa talia, ina ia aloaia ma faamatuu ane le a’oa’oina o le Tipiloma i Pisinisi ma galuega faaofisa.
E ui lava sa umi se taimi o tālia pea, peitai sa iai le talitonuga ma faamoemoe i le alii pule ma le pulega, e iai lava le aso o le a faataunuuina ai lea faamoemoe.
E lei faatelevave foi i ai se tofa ma se manatu o le alii pule, peitai sa faifai mēlie ma le onosai, auā lava lea fuafuaga.
Ae ina ua tali mai la le NZQA, sa lē toe faatali le pulega, ae tatala aloaia loa ma faalauiloa mo ana tamaiti aoga, atoa ma le mamalu o nisi e fia sailiili ma fia maua ia tomai mo le lumanai.
O le afiafi o le Aso Tofi na tea nei, sa faataunuuina ai loa lea faamoemoe o le Polyethnic i Otara, mo le tatalaina o lana Tipiloma i Pisinisi ma galuega i le Ofisa.
O lona taimi muamua lea ua taulimaina ai ma a’oa’oina lea faailoga tāua i lea foi taumafaiga.
O tagata Samoa o loo numera muamua le toatele o loo faaaogāina polokalame a lea aoga e pei foi ona molimauina i nisi o lomiga a le Samoa Times i vaiaso ua tuanai.
O le afioga i le Sea o le ekalesia Metotisi, le susuga ia Rev Masunu Utumapu sa taitai i le sauniga faapitoa mo le tauaaoina o lea faailoga.
Sa auai uma foi le susuga i le alii pule, ma faiaoga polofesa ma isi sui ma le faauluuluga o le aoga, e pei o le faletua ia Lemoe Futi ma lona alii le susuga ia Futi.
Na saunoa le susuga i le alii pule o le aoga, o le agaga lava e tasi o le faafetai, ona ua mafai ona talia le talosaga mo le manuia o tama ma teine ma soo se tasi e fia a’oa’oina lea faailoga tāua.
Aemaise lava o tagata Samoa ma le Pasefika, auā o latou lava ia o loo molimauina le agai ane ma faaaogā taumafaiga a le Polyethnic.
Sa auai foi nisi o malo faaaloalogia mai le Pasefika i lea sauniga faapitoa, ma le tamaitai lalelei o Samoa i Niu Sila, le Miss Samoa Niu Sila,
Metotisi Komiti-Faalavaau sa saunoa faapitoa foi e faamalosiau mo i latou o le a agai e a’oa’oina le Tipiloma mo le tolu tausaga o lumanai poo le sili atu foi.
