Na malaga atu le Sooatulau e matamataina le tatala aloaia o le ata tifaga o le Tuiga i Malaeola. Oka se tumu anoanoai o le aumaimoa. Ua l ofi totonu ma ua laulaututu le toatele.
O le ‘ata a le Sooatulau ina ua faasolo mai le ‘aufaafiafia, o le afioga ia Le’autuli’ilagi Richard Parker ma lona siufofoga mālie ma le amio tausaafia. Ua taufai pati ma sisiva le tupulaga e fiafia tele i fatuga a lea tamaalii o le atunuu.
Sosoo mai le tamaitai o Cindy ma le iila o ana teuga aemaise foi le siufofoga malosi i le pese ma le leo ua taalili ai Malaeola.
O le mea na sili ai ona ‘ata, o le onā sa sivasiva atu i luga o le tulaga o pese ai Cindy, na ona tago atu lava o le tamaitai pese toso le vae ma kiki ese mai le tulaga (stage). Ua faapea le Sooatulau ai nei a lele se moto a le sogaimiti lea ia Cindy, ae faafetai lava o le masani foi o Cindy e fai si ana taleni.
Oka le fiafia o le Sooatulau ina ua faasolo mai le siva a taulelea talavou e toafā, le Dee-Licious Dance Crew. Ae o se fiafiaga o le Sooatulau i le lelei saunia o siva faataupati eseese ma le fefiloi mai o taga faasiva mai atunuu i fafo, ua fefiloi ma taga o siva faaaiuli a Samoa oka le manaia i le maimoa.
Faasolo pea le maimoaga ina ua pese mai le tamaalii o Seiuli Umalau i le pese mo le Manu Samoa. Ia ua seki la mea uma ina ua taalili foi lona siufofoga. Manaia si ona taumafai i le faiga o le Vii o le Manu.
Na faasolo loa le vaega o le polokalame a Seumanu i siva faaiu o le afiafi, na lagona ai loa le vaivai o le Sooatulau ma savali loa i fafo, ae mālie le oo atu i le faitotoa o fai mai si faavesivesi i le faitotoa ona o tagata ua lē maua ni a latou supper ua toe laina nei e toe faafoi mai a latou tupe.
E maua atu lava i le faalogo a Sooatulau o faapea se tasi o le ofisa: “E te lē manao lava e ave lea $5 ma le Manu Samoa?” Ae pei e musu le tamaloa lea na lē maua se taumafataga i lea po. Auā na maua i le faalogo a le Sooatulau e ‘ave se vaega o le tupe e maua mai le Tuiga mo le lagolagoina o le aulakapi a le atunuu.
Na iloa lava le manuia o lea taumafaiga i le tele o le tagata na auai e maimoa, ae talosia foi na ulu uma i tupe, auā e masani tele le Sooatulau i amio a tagata o le malo o Pipo.
