O loo faasolo polokalame o le 16 aso o le tetee atu i soo se ituaiga o sauaga e aafia ai tina ma tamaitai ma fanau iti. E ui ina lē o tetele tala‘iga o le tetee atu i sauaga ae o loo taotaotua atu ai ma le solo a nisi o le itupa o alii o loo molia e leoleo i le faia o sauaga tau feusuaiga fai faamalosi ma isi faiga matagā ua aafia ai fanau teine o le atunuu.
E lei mamao tele atu le masina o Oketopa o lenei tausaga na aumai ai se faaiuga a le faamasinoga i se tamaloa ua nofosala i le falepuipui mo le sefulu tausaga i solitulafono tau feusuaiga fai faamalosi i lona lava afafine moni. O lea ua mae‘a atu le masina o Novema ae e lua ni mataupu faapea na faia ai ni faaiuga a le faamasinoga maualuga i le vaiaso ua mavae.
O se alii 19 tausaga le matua ua faasala i le 13 tausaga i le falepuipui ona o solitulafono o le faiaiga fai faamalosi na toe aafia ai lona lava tuafafine. O se isi solitulafono tau faiaiga fai faamalosi ua faasala ai foi i le falepuipui se alii ua 18 tausaga le matua ona o ni gaioiga tau feusuaiga na ia faia i se teineititi ei lalo ifo o le 12 tausaga le matua.
O le alii lenei e nonofo lona uso matua ma le tina o le teineitiiti na ia faia i ai le solitulafono. E tupu lenei solitulafono o loo nonofo faatasi le teineititi lenei poo le tama teine a le fafine o loo nonofo ma lona uso.
O le alii ua nofosala mo le 13 tausaga i le toese, na ioe i moliaga e fitu o le faiaiga fai faamalosi ma isi faiga matagā i lona tuafafine. O le faamatalaga faamaumauina o le mea na tupu e pei ona sa tuuina atu e leoleo i le faamasinoga o loo faapea mai ai, o lē ua faasalaina na ia tuua le olaga faalea‘oa‘oga i le vasega o le Year 10. Sa galue i le kamupani o le Yasaki i Vaitele i le taimi na ia solia ai le tulafono.
O le faamatalaga a lona tamā i le ofisa faanofo vaavaaia e faapea o lona atalii o se tagata amio lelei ma faamaoni. Peitai ua lē talia gofie e le faamasinoga lea molimau a lona tamā ona o le silasila a le faamasinoga, e leai se tagata e lelei ma faamaoni na te toe faia ni amioga matagā i lona lava tuafafine.
Tasi lenei o tulaga o loo matauina i nisi o lipoti mai le ofisa faanofo vaavaaia pe a tuuina atu ni lipoti o tagata e molia a o lei faia se faasalaga, o le avatu o ni mau mai nisi o le aiga poo ni faifeau foi o nuu e ta‘ua ai o se tagata ua molia e lelei le amio, e faatuatuaina ma faamaoni ae a fua i le matuia o se solitulafono e molia ai e faigata ona talitonuina e le faamasinoga. O le mataupu ua nofosala ai le alii 18 tausaga i le tausaga ma masina e valu i le falepuipui na faaalia e leoleo, na tupu le solitulafono i se tasi o aso sa na o lē ua molia ma le teineititi sa nonofo i le fale.
Fai mai leoleo a o faia feau masani a le teineititi i le umukuka na faateia ina ua fusi atu ia e lē ua molia ma taumafai e faatino i ai se faigaaiga fai faamalosi.
Na lē mafai ona ee le teineititi ina ua pupuni e le alii lona fofoga.
Na taumafai pea lē ua molia i ni gaioiga ae na iai se avanoa na mafai ai ona sao se kiki a le teineitiiti i se vaega o le manava o le alii ma oso ese ai, ae tu ane le teineititi i luga ma momo‘e sa‘o loa i le fale o le faifeau ma ta‘u i ai le mea na tupu. O le fale o le faifeau na logoina leoleo ma suesueina loa le solitulafono.
