E lē o ‘asa se vaiaso i lipoti mai leoleo ma soifua e fano i faalavelave e tutupu. O le masina ua tuanai atu nei o Novema ua faamauina e silia i le to‘a sefulu ua maliliu ai, e pei o le toafā na lipotia i le vaiaso ua mavae.
Faaalia e sui sooupu o le matagaluega o leoleo, e toalua lava tagata o le pule i le ola na maliliu ai.
O alii uma o le tasi na maliu i le sisi o le ua, ae o le isi na inu le vailaau oona fanavao. O isi tagata e toalua o le tasi o se taulealea 24 tausaga o Falealupo na faaoo i ai ni manu‘a tuga ma maliu ai i le falemai. E toalua ni alii talavou o Falealupo o loo taofia nei e leoleo mo suesuega ona ua masalo e iai lo la sootaga i le faatinoga o se solitulafono ua maliu ai lea taulealea.
O se tamā matua o le nuu o Falefa e 71 tausaga lona soifua na maua atu e se tasi o ona atalii o loo taoto mai i lalo o le laau o le moli e i tua o lona fale ua maliu. Na maua atu o loo uu i le lima o le tamā matua se tamai naifi, ae e lē o faailoaina e leoleo pe iai se gaioiga solitulafono na faia i ai e se tagata poo ni tagata pe o se isi faalavelave tau pule i le ola.
Faaalia e sooupu o le matagaluega o leoleo o loo iai se suesuega ua faatino e sailia ai pe na iai se solitulafono na aafia i le maliu o le tamā matua. O lipoti lava a leoleo ua faaalia ai o le tina lea na maua lona tino maliu i se nofoaga i se fanua i uta o le nuu o Faleula, lea sa masalomia ai se pagota na sola i tua ma le falepuipui, e oo mai i le taimi nei e lei taofia se tagata poo ni tagata i le mafuaaga o le maliu. O foliga o lea tina i le taimi na oo i ai leoleo ina ua logo i ai le faalavelave, e aafia uma i ni manu‘aga tuga.
O suesuega foi o loo faaauau pea i le auivi o se tagata e faapea o se alii lea na maua i totonu o se faleese. Faaalia e leoleo na maua e se tagata le auivi o loo afifi i se tainamu. O loo faatali se sailiiliga faafomai e iloa ai pe sa maliu lea tagata i se gasegase, pe na pule i lona ola, ae pe na faia i ai e se tagata poo ni tagata se gaioiga solitulafono e fesootai ma lona maliu.
O loo iai le faamoemoe o leoleo e tatau ona maua le faaiuga o suesuega i nei maliu a o lei mae‘a le tausaga nei, lea ua tatou savalia nei le masina faaiu o le 2015.
