Sami faleie ma togiga fou EFKS Blockhouse Bay

O faamalosi tino ma taaloga le isi tulaga o loo ua matua faatauaina lava i polokalame faaauau a ekalesia mo kalena faaletausaga.
O le faatauaina o taaloga o se tulaga ua tatau ma onomea ona tuu i ai se faamamafa, aua o le tasi lea o auala e fesoasoani tele mo le tino ma lona soifua maloloina. O le manatu lea o le toatele o autalavou ua mafua ai ona faia polokalame ma taaloga.
O se tasi o faamaoniga ona a tapena se autalavou mo taaloga, e ao lava foi ona tapena mo soo se vaega e faatino ai le taaloga.
O le manatu lea sa lei faavaivai ai le autalavou a le Ekalesia Faapotopotoga Kerisiano Samoa i Blockhouse Bay, e saili tupe mo le toe faaleleia o meatotino mo taaloga.
O le afiafi o le Aso Toonai na tea nei sa fai ai se sauniga faapitoa a le autalavou e faapaia ma ofoina atu ai le faleie fou ma se togiga fou, e faaaoga mo le sauni atu i taaloga i le faaiuga o lenei tausaga.
Sa auai atu le tatou nusipepa e molimauina le faamoemoe o le autalavou i lea afiafi, ma feiloai atu ai i sui o le komiti, o loo faagaioia polokalame a le ekalesia ma le autalavou.
O le saunoaga a le taitai autalavou, le sususga ia Sua Sio sa ia taua ai, o le faleie fou ua taulimaina atoa ai ma le togiga, o se suiga mo meatotino tuai ma ua le toe gafatia mo le faaaogaina.
O tupe sa maua i sailiga seleni sa faia lava i totonu o le autalavou ma le ekalesia i nai taaloga sa faatulaga ma isi auala eseese, e pei o tauofoga mai sui taitasi, sa fesoasoani tele mo le faatauga.
O le autalavou sa vaeluaina i vaega e lua, o Mataio ma Mareko, ma o se faiga sa vaaia le faatupulaia ai o le fiafia o tagata e galulue agai i le faamoemoe e pei ona sa faatulagaina. O le polokalame i le afiafi o le Aso Toonai, na le gata i le fiafia e sami ai galuega mo meataalo, ae sa faailoa ai foi ma taleni eseese mai au e lua e pei ona vaevae i ai.
O se tulaga ese sa maitauina i lea po, ona o le felanulanuai o faafiafiaga i pese, siva faaleagaga, ae iai foi nai aitu o loo iai i le autalavou, sa maua ai si pauna ata, ona o le malie o aga sa faatinoina.
O se tasi o itu taua sa vaaia foi i lea afiafi, ona o le finagalo lagolago o le susuga i le faafeagaiga ma lona faletua, ua le nofonofo ai i le nofoa vaevaeloloa o le galuega, peitai sa auai ane ma saasaa faatasi ma le autalavou, ma ua silafia ai foi e le ekalesia le talenia tele o le faifeau ma lona faletua i le tulaga o le siva Samoa.
E ui lava ina ua maea ona faatauina le faleie, ma le isi togiga fou, peitai e lei gata ai le soifua auauna ma le galulue pea o le autalavou, aua sa faaalia i lea lava foi afiafi le agaga foai e ala i taulaga tupe sa foai mai au e lua.
O le afioga ia Tiumalu Akeli o le sui peresitene sa fai ma Fofoga o le po, i le fofogaina o taleni ma le faagasologa o le polokalame, aemaise o le faafeiloaiga o malo sa faatasi atu.
O le susuga ia Rev Sesera Tolovaa Siimoa ma le faletua ia Litara Siimoa o le taitai o le ekalesia. O le komiti sa faafoeina le autalavou mo lenei vaitaimi i le faagaioia o polokalame uma mo le tausaga aemaise ai le tulaga i taaloga, o le taitai o Sua Sio, faapea lona sui le afioga ia Tiumalu Akeli.
O le afioga i le peresitene o Tuivaiese Faatonu, a o lona sui o le susuga ia Soatama Tulagaese Tavita. O Faanape Teo o le failautusi, ae o le sui failautusi o Nerisa Faimata Tauta. O le teuoloa poo le teutupe, o le tamaitai o Ame Poasa.