O le laei faa-Samoa moni o le itupa o tamalii ma fanau tama o le tatau, a o le itupa o tamaitai ma fanau teine o le malu. E ui i le maini ma le tiga o le faatinoina, ae o le taunuuga o le viiga ma le faaeaina aemaise o le lagona Samoa moni e lē mafai e upu ona faamatalaina.
O lagona ia na faatumuina ai agaga o nisi o tamalii ma se tamaitai se toatasi ina ua mae‘a tapena o latou laei ma samaina i ni nai vaiaso ua tuanai atu. O le laoa o le fetalaiga ia Faalavelave Farani Frost i le pitonuu o Granbourne na fai ai le faamoemoe.
Na amataina i le sauniga puupuu na saunoa i ai le susuga ia Epikopo Samuelu Ahwo Leung-Wo na malaga mamao mai le motu o fiafiaga i Samoa i Sasae poo Amerika Samoa. O le fofoga o le aso o le tofa ia To‘aalii Puni mai le afioaga o Samatau.
O le agaga o le faafetai ma le faagaeetia o i latou uma ua laei ma faapaiaina i lea aso, le fetalaiga ia Faalavelave Farani Frost mai Samatau, susuga ia Alema Leung-Wo mai le afioaga o Eva, susuga ia Samu Viane mai le afioaga o Laulii, ma le tamaitai o Mary Trisha Farani mai le afioaga o Samatau, aemaise o aiga alii, na sasaa ma faatino ai faaaloaloga faa-Samoa e masani ai aso ma faamoemoe faapenei mo le tufuga na gapatia ma le galuega fita ma le mamafa, le susuga ia Su‘a Faalavelave Vitale mai le afioaga o Samatau.
Na saunoa le afioga ia Fuaialii Anthony Sofe se tasi o tamalii sa auai ma tapueina ata, o le maualuga o le agaga faaeaina na faaleoina i le faamanū ma leo o viiga aemaise o loimata o le olioli ma le fiafia, auā ua mou atu le maini o le au, ae o le agaga mitamita o le a tumau e faavavau.
