O le alaga a le faisalamo o Tavita, ‘lo‘u agaga e, ia faamanu atu ia Ieova, o mea uma foi oi totonu ia te au ia faamanu atu i lona suafa; aua foi nei galo se mea e tasi o ana meaalofa.”
O le sini autu lea o le faamoemoe na iai le po o le Aso Faraile ua mavae 31 o Oketopa i le hall a Rarotonga i Magele, i le susuga i le faafeagaiga ia Mataia Sam Nofoaiga ma le faletua ia Vaisulu Nofoaiga faapea le Ekalesia o le AOG Church of Samoa i Royal Oak i Onehunga.
O le toe patipatia ma le faafetai i le Atua ona ua mafai ona faataunuuina le faamoemoe sa alo atu i ai nisi o tamafanau o le Ekalesia e ala i le latou uluai CD ua faaigoaina o le Tatalo i le Faatuatua. Na matuā faatumulia lea nofoaga i susuga i faafeagaiga ma o latou faletua mai matagaluega taitasi o lenei pulega faapea aiga o uo ma ē masani na faatasi uma atu e molimauina lenei faamoemoe.
Sa faapea foi ona mafuta atu i ai ma le faiaoga mai le kolisi o Malua o loo galue faasikolasipi i lenei atunuu le susuga ia Rev Dr Vaitusi Nofoaiga. O le tamā o le galuega a le Ekalesia i Royal Oak sa fai ma fofoga o le po le susuga ia Mataia Sam Nofoaiga.
E tele foi ni pese o le CD sa usuina mo le faafofoga a le atunuu sa faatasi atu i ai. Ae o le faagaeetia o le faafofoga ma le molimau a le auvalaaulia i le matagofie o tapenaga o pese a lenei CD, sa faatupuina ai le loto foai ma le loto fia soosoo tau‘au e ala i seleni na tauaao atu mo le Ekalesia faapea aitema na saunia ma tapenaina e nisi o susuga i faafeagaiga faapea foi aiga ma ekalesia sa auai.
O pesega sa avea ma feau molimoli i loto o le auvalaaulia, faatasi ai ma le upu folafola a le Atua na salani atoa ai le faamoemoe lea sa mānavaina e le susuga i le faafeagaiga ia Fuimaono Naoia, ma faaiu ai loa i le agaga faafetai a le susuga i le faafeagaiga ia Mataia Sam Nofoaiga i le mamalu o le atunuu sa molimauina lea po fiafia, ae taualuga ai i le taumafataga na saunia lava e le Ekalesia i Royal Oak, ma CD sa tufa fua uma e fai ma meaalofa mo le auvalaaulia. Ae na saunoa le susuga ia Pitovao Kirisimasi i le tapenaga o le CD, e lei faigofie ia te ia ona e tele faafitauli ma le pisi i galuega, ae o lona naunau i le faaaogāina o lana taleni ma le meaalofa mai le Atua na tuu atoa ai lona loto i le Atua e fesoasoani mai ina ia tau lau o lona faamoemoe.
E lua tausaga na ia tusitusia ai ma fati pese ae tasi le masina na pue ai ma tuufaatasia e le susuga ia Moana Va ma le fale pue pese o le Ola i Vavega. Ua tapena nei mo le pueina o le isi CD lona lua o le Tatalo ma le Faatuatua.
