Ua faamautu se sainiga lima i le va o le Malo o Samoa ma le Lala o Atinae a Malo Aufaatasi auā le unaiga o le faatinoga o se maliega ua ta‘ua o le Feagaiga i Rio.
O le feagaiga lenei ua malie ai Samoa ina ia faamalosia nisi o aiaiga o le feagaiga auā le faaleleia o le siosiomaga i le eleele ma le sami aemaise o le agai i auala e mafai ona tali atu ai i suiga ogaoga o le tau.
O lenei polokalame ua agai ai e fausia ni tulafono ina ia lima taitaina ai galuega i totonu o Samoa i le puipuiga o le Siosiomaga, ma o le Faalapotopotoga e faatupeina atinae o le Siosiomaga a le Lalolagi, le Global Envrionment Facility (GEF) lea ua faatupea lenei polokalame o le a faagasolo i Samoa nei.
Ta‘ua e le tamaitai Ofisa Sili Lagolago o le Matagaluega o Punaoa Faalenatura ma le Siosiomaga, o Anne Rasmussen, o lenei atinae ua agai i le faalautele o le silafia o le atunuu i nei maliega e pei o le Feagaiga i Rio ma le sao o Samoa e tatau ona faataatia e faamamalu ai lenei feagaiga.
O le feagaiga ua sau ai ma ona tulafono faavaomalo ae o le sainiga lima i Apia i le sao o Samoa o le a faatino ai, ua foai mai ai le $2 miliona tala mo le galuega o le a faatautaia. O lea galuea o le a vaavaai ai i le aumai o tulafono faavaomalo nei ma taumafai e aofia i totonu o tulafono a Samoa lava ia.
O lea ua ta‘ape atu le fono a Malo laiti tau atiae o le lalolagi le SIDS lea na usuia i Samoa ma o taiala lava nei na faamamafa i lea fonotaga, o le taumafai lea ina ia faia ni galuega e faamalosia ai le tali e mafai ona avatu e malo laiti i faafitauli o feagai ma i latou i le suiga o le tau, le siisii o le sami, le tele o afā ma galulolo, le mago o le eleele ona o mugala.
Ua tele ma anoanoai faafitauli ma ua taumafai nei le Malo Aufaatasi ina ia mafai e malo laiti ona galulue faatasi ma le lagolago a malo tetele e foia faafitauli ua aafia ai soifua o tagata o nei atumotu ona o nei suiga ogaoga.
Faaalia e le sui o le UNDP i Samoa, o Lizbeth Cullity (silasila i le ata) a lelei le iloa ma le malamalama o tagatānuu o Samoa e fiu e mafai ona faatino le galuega o loo fuafua e tino mai i lenei polokalame ua faamautu i le sainiga lima. Talu ai le tele o tulafono ma aiaiga ua siomia ai galuega tau i le siosiomaga, o lea ua manatu ai lenei polokalame o le a mafai i lenei sainiga lima ona maioio lelei lava tulafono e tuufaatasia i Samoa nei auā le unaiga o le Feagaiga lenei i Rio ina ia aua ne‘i nini faatasi ma tulafono ua iai nei auā lava le puipuiga o le Siosiomaga o Samoa lava ia.
Faaalia e le sui o le Malo, le Ofisa Sili Lagolago o Tupe, le afioga Peseta Noumea Simi, e tāua tele le fesootaiga i le va o Samoa ma Malo Aufaatasi, i le taumafai lea e unai aiaiga o lenei feagaiga, ma o se auala o le a mafai ai e Samoa ona ausia aiaiga tusitusia o le feagaiga ma faaleleia ai lona siosiomaga ma le soifua o ona tagata i lalo o tulafono o le a mafai ona fausia i lenei polokalame fou.
