E to’afitu o loo talosaga i le avanoa o le Komesina o Leoleo ma ua faailoa e se molimau faatuatuaina, oi latou ua talosaga e aofia ai ni alii leoleo se toalua o loo umia le tulaga faaleoleo o le Suprintendent.
O isi o loo talosaga o se tamaitai o loo avea nei ma Ofisa Sili o se matagaluega a le Malo, ae sa galue i le matagaluega o leoleo i lalo o le polokalame fesoasoani a le Malo o Ausetalia. O le tasi o le toafitu o loo talosaga i le avanoa o se alii sa galue o se leoleo ma sa umia le tulaga o le Komesina lagolago ae na faamavae i le tausaga ua mavae, ma o loo galue nei o se loia tutoatasi.
O loo toe talosaga foi le afioga Fuiavailili Egon Keil i le avanoa, ae o le isi toalua e faapea o nisi mai fafo e iai agavaa i le galuega faaleoleo.
E tapunia talosaga i le tusa nei ma le vaiaso mo le avanoa, ae faia le faai’uga a le Kapeneta i le sailiga o se sui Komesina. E totolu na talosaga o alii leoleo sinia e toalua ma le tamaitai leoleo sinia le susuga Moanalisa Tia’i Keti, lea ua filifilia e avea ma sui Komesina. Na maua le fesootaiga i le sui Komesina filifilia ae sa lē finagalo e aumai sona finagalo e tusa ai o lona filifilia.
O le Aso Lulu ua mavae i le fono a le pulega o le Matagaluega o Leoleo na faailoa ai e le Komesina o Leoleo, Fuiavailili Egon Keil, le tofia o Moanalisa. “Ia o lea ua mae’a ona faasilasila mai e le Komesina le faai’uga”. O le saunoaga mai lea i se tasi o leoleo sinia le susuga Salaa Sale Salaa, o loo faauluulu iai le vaega suesue le CID.
O loo faaauau pea le tautua a le Komesina o Leoleo mo se taimi lē tumau e faatali ai le faaiuga o le sailia o se Komesina o Leoleo.
O le tofiga Sui Komesina o Leoleo sa iai i le tele o tausaga ua mavae, ae na aveesea ina ua faaofi i le tulafono o galuega faaleoleo tofiga e fa o le Komesina lagolago. Oi latou sa tofia iai sa lagolago i le Komesina o Leoleo, peitai na aliali i fafo ni faaletonu i feteenaiga o Komesina lagolago sa iai ma le Komesina o Fuiavailili Egon Keil.
Na taunuu ia vesiga i le lokaina o le Komesina ma faia ni ona moliaga solitulafono. Na oo i le faamasinoga le mataupu ma toe faasolomuli ai i tua moliaga o Fuiavailili, seia oo ina toe faaa’e ma faaauau i le tofiga Komesina o Leoleo.
O le masina o Aperila na mae’a ai lona tolu tausaga muamua o lana konekarate. O le fesili, pe toe filifilia o ia e le Malo mo le isi tolu tausaga, pe o le a filifilia se isi fou e tauaveina le tofiga? O le a tatou maua le tali o lena fesili pe a mae’a ona faatalatalanoa i latou e toafitu ua talosaga ma aumai le finagalo o le Kapeneta o le a taualuga iai le filifiliga mulimuli.
