“Ia tatou galulue faatasi, a iai se mea matou te fesoasoani atu ai, ia fai lena ma matou sao i le tou galuega”…Fred Amoa
Ua tuanai futia ma faaletonu sa fetuleni ai lagona faaalia o le toatele ma agai ni faaseā i nisi o loo pulea le faafoeina o le iuni lakapi a le atunuu aemaise foi o nisi o taitai o le aulakapi a le Manu Samoa, a o loma le Ipu o le lalolagi i le tausaga ua mavae. O faaseā na afua mai i le lipoti a le kapeteni o le Manu Samoa o Mahonri Schwalger, ae na mafua lagona le fiafia o le alii kapeteni ma agiga i lipoti a nusipepa ma isi auala o faasalalauga ma faasi‘ugutua ai le Iuni lakapi a le atunuu.
Ua avea la ia futia ma faaletonu ua tuanai ua fai ma faatupu manatu lelei i le tulai mai o se isi tamafanau a Samoa le susuga Fred Amoa e avea ma Ofisa sili e pulea le faafoeina o galuega a le iuni faatina. O le taiala o pulega lelei e aofia ai le faamanino, ma faapupula ni faaletonu ma ia mautali atu i lagona faaalia, o vaega ia ua galue i ai le ofisa sili. O lona finagalo i le feiloaiga muamua ma tusitala ina ua mae‘a ona tofia, na ia faailoa ai lona agaga naunau e faatino se tautua mo le lelei o le lakapi a le atunuu.
O faaletonu sa laga e le kapeteni o Mahonri Schwalger i le fenumiai o tiute tauave o le taitai malaga sa nafa ma le Manu Samoa i le Ipu o le lalolagi na faaalia e Fred o vaega ia e faatonutonu lelei i taiala o pulega lelei ina ia le toe fesopoa‘i ma fenumia‘i ai tiute tauave o i latou e vaaia aulakapi a le atunuu. O le fesili i le ofisa sili pe alu atu o iai ni taiala o pulega lelei, ae na ia tali na te leiloa i ai i le taimi sa iai isi i le pulea o le ofisa o le iuni, ae o lana galuega ua fai nei ia faataoto alafua o pulega lelei e lima taitaiina ai tagata uma o loo latou galulue e oo lava ia i latou e tofia ma filifilia e pulea aulakapi a le atunuu e pei o le au tele o le Manu Samoa.
O le susuga Fred Amoa o se loia faauuina, ma sa galue i Samoa i le ofisa o le Loia sili a le malo a o lei faaauau atu lana auaunaga faaloia i isi atunuu o le Pasefika e pei ona sa galue i le ofisa autu mo faigafaiva a le Pasefika o loo i Honiara le laumua o Solomona. “O lo‘u naunautaiga ia fai so‘u sao i le lakapi a le atunuu, ma e faalagolago foi se naunau i le lagolago mai a le atunuu aemaise le tou vasega o le au faasalalau tala”.
“Ia tatou galulue faatasi, a iai se mea matou te fesoasoani atu ai, ia fai lena ma matou sao i le tou galuega”. O le susuga Tausa Faamaoni ua see ane nei e avea ma faiaoga o le au taitoafitu ma ua ia faaalia le agaga fiafia o tama uma o le au ona ua tofia le susuga Stephen Betham i le tofiga faiaoga o le Manu Samoa. “Ioe o se mitamitaga lena o tama ua faaeaina le susuga Stephen i se isi tofiga e sili atu”. O le susuga Fataalii Milovale Moke o le sa avea ma faiaoga o le au lakapi tele a le kalapu lakapi a Vailele ua avea ma faiaoga lagolago ma o le taitai malaga foi lea. “Lagona lava le faagaeetia i lenei tofiga ma e le faigofie aua e tele foi luitau”.
