Ua faamatuu e le faamasinoga le tusifolau ma pepa malaga o le sa avea ma faipule ma minisita o faatoaga, le susuga Seuala Taua Kitiona Tavaga, e avanoa ai ona tuua Samoa.
Peitai ua ave le faamaoniga o lona toe foi ai e tali i moliaga o le faia o solitulafono tau faatosina i le palota ia i latou ua sainia se maliega e toe foi mai lea tamalii i le atunuu mo lona faamasinoga.
O le faaiuga a le faamasinoga e mafua i se talosaga a le loia a le o loo molia.
O loo loma taualumaga a le faamasinoga e suesue ai molimau a leoleo e lagolago ai tuuaiga ma moliaga o faatosina faaalatua o le palota o loo molia ai Seuala Taua Kitiona, lea ua mae‘a ona faamauina lana tetee i moliaga uma.
O lona tofi faipule na toe soloia ina ua faamaonia moliaga i le faamasinoga o palota, lea na faamaonia ai foi ana tuuaiga faasaga i se tasi o tamalii sa la tauva lea na tagi faasaga i ana faatosina solitulafono.
I se isi tala mai le faamasinoga, ua faamautu nei le aso e suesueina ai molimau a leoleo faasaga i moliaga o le susunu fale o loo molia ai ni taulelea se toalua o le nuu o Solosolo, e mafua i le faatamaia o le maota o le Afioga Leota Leuluaialii Ituau Ale i le malaia poo le afi.
O Ioane Vaipapa ma Taualii Lemusu o loo tetee i moliaga o le susunu fale. O le aso 22 o Aukuso e suesueina ai o la moliaga i luma o le Faamasinoga Faaitumalo.
