Ua faatonu e le faamasinoga leoleo ina ia faia se suesuega pe na faapefea ona mafai ona tuua Samoa e se tasi o loo molia i moliaga, o le taufaavalea, lima tagoese ma le faia o gaioiga faaalatua.
O Ioane Viliamu Mikaele o loo molia faatasi ma le tamaitai o Vaioleti Stowers i moliaga ua ta‘ua atu, faapea solitulafono o le talepe fale e fesootai ma se gaioiga na faatino e i laua i le faletalimalo tu matafaga i Satuiatua i Savaii, ma se gaioiga na la toesea ai se tinoitupe e silia i le ono afe tala a Harry Faumuina o Lepea.
O loo molia foi i laua ia i le talepeina o se faleoloa i Siumu ma toesea ai ni pepa fafaga telefoni e tusa le tau aofai ma le $11, afe tala. O se tina foi o le nuu o Aleisa na faavalea e Vaioleti ma aitalafu se tupe ae lei toe totogia, o le isi lea o mataupu o loo molia ai lea tamaitai.
O le tausaga ua mavae na amata valaau ai nei moliaga, peitai sa faaauau suesuega a leoleo i nisi o mataupu sa tuuaia ai Vaioleti ma Ioane Viliamu Mikaele ma faamautu uma ai moliaga e tuuina atu i le faamasinoga faatasi ai ma molimau e lagolago ai.
O le ua tuua le atunuu sa aumau muamua i fafo, ma o popolega o le faamasinoga ona o le faaono toso ai o le faamasinoga pe a le vave ona sailia lea tagata ma toe aumai e tali i moliaga.
