O loo tau saili nei e le Faalapotopotoga o le Toomaga mo ē Puapuagatia le aiga o se tamaitiiti na avatu e leoleo i lo latou ofisa i le vaiaso na tea nei ona ua fiu e fesiligia ina ua maua o fealualuai solo i le taulaga o Apia.
E lei tele foi se faamatalaga na avatu e leoleo i le faalapotopotoga se‘i vaganā ai e foliga mai ua iai se faaletonu o lona mafaufau. E tusa poo le fitu i le valu tausaga le matua o lea tamaititi. E lē o mafai ona tautala pe tali ane i se tagata ma e talu ona tuu atu e leoleo na ta‘ua e le Toomaga mo ē Puapuagatia, e na o le sioa lava i luma o lenei tamaitiiti.
E fai ma oso lona maalili ma e foliga mai sa faaoolima se tasi i lea tamaitiiti peitai o loo tālia siaki a le falemai na ave i ai e le Faalapotopotoga ona o popolega i le ono tulai mai ai o se faalavelave i lea tamaitiiti.
Ua ave lipoti i luga o televise ma leitio ae e lei alu atu lava se matua a o se isi foi o se aiga i le Toomaga mo ē Puapuagatia, ma o se tulaga faigata lea ona talia i faalavelave ua vaaia nei le toatele o nisi o fanau ua faapea ona tausia nei e le Toomaga mo ē Puapuagatia.
E iai foi le isi tamaitiiti na maua e leoleo ina ua logo ane i ai e le Koluse Mumu faapea o se tamaitiiti ua lipoti atu o ia e sau mai i Tafuna i Amerika Samoa.
Sa maua muliumuli ane o le tamaitiiti lea e tusa ma le 14 tausaga le matua e sau mai i se vaega lava o Faleata ae ua agai i le Koluse Mumu ma talosaga o ia e fia foi i Tafuna lea na malaga mai ai ae ua foi lana uo tama ma lona tamā i Amerika Samoa ae tuu ia.
O lea na taumafai e fesootai Amerika Samoa ae iloa mulimuli ai sa tafao lea tamaitiiti ma se autalavou mai i Samoa nei i se soo i Tutuila ma o iina lea na faauo ai i se tamaitiiti Tafuna ma lona aiga ae ua toe foi mai lea tamaitiiti ma taumafai loa e sue se auala e toe alu ai i Amerika Samoa.
Ua fesiligia foi la pe aisea lava ua alu ai lea tamaitiiti i lona laititi e saili se auala e alu ai i se aiga ua na o se vaiaso na mafuta ai. E ui o lea ua toe faafoi o ia i lona aiga moni lava i le talafatai o le taulaga.
E lē o iloa lava la poo fea tonu e sau ai le tamaitiiti lea e lē o tautala lava i le vaaiga a le Toomaga mo ē Puapuagatiama o loo talosagaina e le Toomaga mo ē Puapuagatia se aiga o loo tau saili se latou tamaitiiti e fesootai atu i latou.
O le faafitauli o loo talotalo le Toomaga e lē o tulai mai o le aiga lava o lea tamaitiiti na sauaina o ia fua i le tulai mai ai o faigata nei ua lē tautala, leai se fesootai ane i le aufaigaluega a leToomaga mo ē Puapuagatia.
