O le amataga o lenei tausaga na faaipoipo ai se alo o Samoa ua iloga i le Toa Samoa le susuga ia Kyle Stanley ma lana manamea ia Niketa Patterson i le pitonuu faasaga i le sami o Sapphire Bay i Sini i se sauniga matagofie.
E toatele sui o le Toa Samoa na auai faapea le alii iloga ia Benji Marshall ma Jason Nightingale o le aufili a le Kiwi. O le tauvaga lakapi liki a le toafā pito i luga a le lalolagi i le tausaga fou na mausali ai le pea a Kyle Stanley ma Ben Roberts lea na faateia ai le lalolagi i le maoae o le Toa Samoa.
Ua amata nei tapenaga a lenei alo iloga o Samoa mo le amataga o le taamilosaga o le 2014 mo lana kalapu le Cronulla Sharks ma e ono vaai i le taamilosaga amata a le NRL le toaiva i Aukilani poo le Auckland Nines e amata ai le 2015.
O le filifilia o Stanley i le Toa Samoa i le 2014 na faateia ai le toatele i Ausetalia nei auā o le tele o ana taaloga i le tauvaga autu NRL sa taalo ai i le au laitiiti a le Sharks ae peitai na matuā tuu uma lona malosi auā le taumafaiga a le Toa Samoa i le 2014.
Na uma le tafafā o le 2014 ae tulai mai o se tama taalo aupito mataina lana taalo i le ‘afa e aofia ai BJ Leilua, Daniel Vidot ma Josh Maguire ma amata faasiusiu mata i ai isi kalapu aemaise le aufili a Niu Sa Uelese.
