E toe to‘a 800 i latou ua galulue pea i le Kamupani gaosi uaea o le Yazaki Samoa i Vaitele. O se numera ua palasi mai i le silia i le to‘a 2,000 lea sa iai i le lelei ai o lenei foi atinae ua faatūina i Samoa. Peitai o le tele o faletaavale i fafo aemaise i Ausetalia ua tapunia, ua alu atu ai lava ma le numera o tagata faigaluega i Vaitele ua lē o toe moomia.
O le taimi lenei ua na o uaea o taavale o le ituaiga o le Toyota lea e gaosi lava i Samoa nei. O isi uma taavale ua tapunia fale e gaosi ai i Ausetalia, ua lē o toe gaosi atu i Samoa ona uaea. Ona pau lava vaega o loo gaosia o spare parts poo totoga o taavale e pei o le Holden e moomia mai i Ausetalia.
Ua iai valoaga o le isi lima tausaga ua lē o toe iai se Yazaki i totonu o Samoa ae o nisi ua faapea mai e lē au i le lima tausaga ona o le tulaga ua agai i ai falegaosi taavale i Ausetalia. O le faamatalaga mai i le alii Pule o le Kamupani i Samoa, le afioga Funefeai Oliva Vaai, o le taimi lenei o loo faaauau feutaga‘iga ma le Pulega o lenei kamupani i Iapani e vaavaai ai i le tulaga e oo i ai lenei auaunaga.
Sa iai le faatonuga na tuu mai i Ausetalia na ta’ua e Funefe’ai sa fautuaina ai le faia o se isi vaea peitai o lea ua iai le aso malolo ua faamalosia nei e le kamupani ona o le manatu e sili le iai o le aso malolo lea e leai ai ni galuega nai i lo le vaega o le aufaigaluega. Ua avea nei suiga ma auala ua vaaia ai le atili o le malosi o le fesootaiga i le va o le pulega ma le aufaigaluega i Samoa nei a o faatalitali lava le iuga e oo i ai le tautua ua tele tausaga o faatino atu i Samoa nei mo lea kamupani.
O le faaiuga o le vaiaso na faapea ona talanoaina ai nisi o auala e saga faaleleia ai le auaunaga mo le Toyota lea e totoe ana uaea ua gaosi atu i Samoa ma na ta‘ua e Funefeai o lenei talanoaga ua tapa ai finagalo o le aufaigaluega ina ia mautinoa e manino le pulega i ni faafitauli o ono tulai mai i le faatinoga o le galuega ma o se auala foi lea na ta‘ua e le alii pule ua faamausali ai le lagona o tagata faigaluega o se tautua lenei e faamoemoe ia i latou le lelei ma le leaga.
Sa iai foi ma le pulega mai i Iapani i lenei faatalatalanoaga ma o le auala ua faapea ona faatino ai lenei fesootaiga na fai faatauvaga ma na vaevae ai le aufaigaluega i vaega e lima. O se faiga lenei ua vaaia i lala uma o le Yazaki i isi atunuu o loo faamautu ma galulue ai. E le’i mamao atu nei na faalauiloa ai se lapataiga e toe siaki ai taavale o le Toyota i soo se itu o le lalolagi, ona o sasi na tula’i mai i le faapipiina o uaea i foeuli o taavale o lea ituaiga. E lei aafia ai taavale i Samoa nei ona e le o uaea na faaletonu ae o se sasi i le faapipiiga o nei uaea e fale gaosi taavale.
O le auga o le faamoemoe ina ia aua ne‘i iai ni faaletonu e tulai mai i le amataga o lenei galuega mo taavale afi, o le tuufaatasia lea o uaea e pei ona gaosi atu ai le tele o ia uaea i Samoa nei.
