O tina o le pae ma le auli i totonu o aiga, e faamafolafola mea ua faaletonu ma lagolago i le tamā i ona tiute tauave i totonu o le aiga, nuu faapea le galuega a le Atua. Ua faatusaina foi lona lelei, “E sili lona Tau i Penina.” O faalupega ia e masani ai le atunuu i tausaga uma e faalupe ai tina i ona tiute tauave e masani ai i soo se afioaga, aemaise lava i le Aso Sa ua faapitoa mo i latou e pei ona faamanatuina i tausaga taitasi.
O le Aso Sa ua mavae, 11 o Me na vaaia ai le faatumulia o le malumalu o le ekalesia o le International Revival Church i Mount Wellington i uo ma ē masani aemaise o aiga na fai sauniga faatasi ma faamanatu le Aso Sa o Tina a lea foi ekalesia. Na muamua lava i le viiga e pei ona masani ai lenei tapuaiga, ona faagasolo loa lea o tala faatino o siva faaleagaga faatasi ai ma molimau.
O le faatinoina o le polokalame atoa sa faatinoina lava e tina o le ekalesia. Sa lagona le faamanuiaina o loto o tagata i aitema na molimau i ai tina i lo latou Aso Sa, ona e iai taimi o le olaga e lafoai ai aupega o le galuega a le Atua pe a oo mai faafitauli o le soifuaga, ae faamalosi tina, tatou te mafaia mea uma i le faamalosi mai o le Atua ia i tatou. O se luitau ma se toe tapue i le ola galue ma le ola auauna i le Atua ma lona finagalo. Na faaiu le polokalame i le folafolaina o le Afioga a le Atua e le tina o le galuega le faletua ia Sieni Toomata.
Na sosoo ma le faaulaina o tina e le mafutaga a tamā e pei ona masani ai tausaga taitasi. O le Rocks of Ages o loo galulue ai le faafeagaiga ia Toomata Siona ma le faletua ia Sieni Sione.
