Ua mae‘a nei ona tuufaatasia le CD faapitoa (special edition) a le susuga i le alii pese lauiloa ia Taufi Faaosofia mai Neiafu i Savaii.
E lē tau faailoina le fogatia i le logo mālie foi o fatuga a lea foi alo o le atunuu e pei ona lausilafia e le toatele.
O lenei CD, sa pueina faapitoa lava i le Lavina Records i Melepone, (Lupematasila Levae) o saafiafiga o si ona alalafaga o Neiafu e faamanatuina ai le 100 tausaga Iupeli Auro talu ona faavae mai le Lotu Tausi Aperila i le tausaga 1913 seia oo mai i le tausaga nei Aperila 2013, lea o le a alo atu i ai le afioaga i le amataga o Aperila, ma e toatele alo ma tamafanau a le afioaga i atunuu i fafo ua sauni malaga e molimauina lea faamoemoe.
O le susuga ia Taufi Faaosofia o loo alala i Melepone ma e faamemelo lava ma pele tasi i le alii pese lona afioaga sa soifua ma ola a‘e ai. Ua fuafua o le a malaga atu o ia ma le aiga i le aso faamanatu o si ona alalafaga o Neiafu i le Itu Asau i Savaii.
Ia manuia le Iupeli Auro o Neiafu mai le pulega a le Samoa Times i le amataga o Aperila
