Ua nuti le kate tautele ma ua lagona ai le leo i Rama i le tagi auā a Rasela. O le po o le Aso Toonai na tea nei na faamanavaina ai e le Atua galuega a se tasi o toe ulutaia o le Atu Kuki i Ueligitone, le afioga i le Tiakono ia David Isaia.
E toatele le mamalu o le tatou atunuu na auauna i ai lenei tamā aoga i le tofi Lesitara o pepa a le malo (Justice of the Peace). Ua loa foi lana tautua i le vaiaai o Porirua i lona tiute faataitai i soo se Komiti Faafoe o aoga faapea le Faalapotopotoga o tagata Atu Kuki i Ueligitone ma Porirua na avea ai o ia ma Taitaifono. E tele ni tofi lelei sa auauna ai i soo se faalapotopotoga a tagata Pasefika e lē gata i le itumalo a Ueligitone ao fafo atu foi o le laumua.
O se auauna loto maualalo ma le amio filemu a o avea ma Failautusi Aoao (Session Clerk) a le Ekalesia Perepereane i Porirua mo ni tausaga e silia ma le 30 ma ona tupu. O se uo mamae a le toatele o tagata Samoa i totonu o le itumalo i Ueligitone.
O se tasi o ana galuega tele a o taitaifono i le mafutaga a le Atu Kuki na faatūina ai le Maota o tagata Atu Kuki lea ua faaigoaina o le Akapuanga, ma o loo tele foi ina fai ai mafutaga a o tatou tagata Samoa i lea maota tele ma le matagofie.
E lē mafaitauina mea lelei na faia e lenei tamā i ona tofi faavaiaai (community roles) ma ona tiute faatiakono i le lotu, sa tautua ai ma lona faletua ia Nga i le tofi Tiakono i laua uma i le ekalesia PIPC i Porirua.
E lei leva ona gasegase o ia peitai o le vaaiga na ta‘ua e fomai o le stroke na mafua ai ona ave i le falemai i le vaiaso i ona tua, ma na faapena lava ona vaaia ai lona lē mafai ona tetee atu i le gasegase, ma ua faamanavaina ai e le Atua ana galuega lelei i le po o le Aso Toonai na tea nei. O le a misia e le toatele lenei tamā aogā ma le tausaafia. E lē galo ona foliga filemu ma le laei lelei i soo se taimi e vaaia ai o ia.
Ia faamafanafanaina le faletua ua tuua ia Nga ma le nofoaalo faapea aiga ma le ekalesia. Manuia lau malaga Papa David
