Ua ioe le faamasinoga o le faaiuga a alii ma faipule o le nuu o Solosolo na mafua ai ona susunu e Ioane Vaipaipa 34 tausaga le matua ma Taualii Lemusu 32 tausaga o le soifua, le maota o Leota Leuluaialii Ituau Ale.
Peitai o le finagalo o le tamaitai faamasino o Mata Tuatagaloa, ina ua lau le iuga o Ioane Vaipaipa ma Tuualii Lemusu, sa tatau ona molia ai ma matai na faia le iuga ona o le mafuaaga lea na faatino ai le solitulafono e taulelea ua nofosala nei i le falepuipui.
O le Aso Faraile ua mavae na lauina ai le iuga o ia alii e toalua ma e 14 vaiaso o Ioane tusa lea o le 3 masina ma le lua vaiaso ae 22 vaiaso o Taualii Lemusu tusa e lima masina ma le lua vaiaso i le falepuipui.
O le suesuega na faatautaia e leoleo e na o le toalua lava i laua na molia ai, o le tasi o i laua ia o se toalua o se afafine o se tasi o matai faiupu o Solosolo. O le faaiuga a le faamasinoga ia i laua ua faasalaina, sa faavae mai i se faaiuga a le faamasinoga e faasino i le faalavelave na susunu ai ni fale o se aiga i Gataivai i Savaii.
Peitai o le eseesega o le susunuga fale i Gataivai ma le susunuina o le maota o Leota Leuluaialii Ituau Ale ona o le mataupu i Gataivai sa molia uma lava matai ma tagata o le afioaga na tuua‘ia i le faia o le faalavelave faapea ai ma le faaiuga e mu le foaga.
Taui o mea na faaumatia i le afi
O se talanoaga faasamasamanoa ma le afioga Leota a o tālia se iuga o moliga o taulelea na faatupuina le afi na aafia ai lona maota, na ia faaalia ai o loo silasila e tuuina atu sana tagi mo se taui tupe o mea uma na faaleagaina i le malaia poo le afi e lē gata o ana meatotino tāua ma anagata ae o le fale.
E lei faailoaina mai e Leota i lea talanoaga pe fia se taui o loo silasila e tuuina atu i le faamasinoga e totogi atu e i latou na aafia i le faia o le faaiuga ma le faataunuuina o le faaiuga na mafua ai ona susunu lona maota.
O se vaai faalemafaufau i ai e lē itiiti ifo ma le ‘afa miliona poo le sili atu foi le tau o le maota o lenei tamalii ma ana meatotino na faatama‘ia. O le a tuliloaina pea lenei vaega o le tagi a lea tamalii i se aso o le a folasia ai i luma o le faamasinoga.
O le fono a le afioaga o Solosolo ina ua mae‘a ona lauina le iuga o alii e toalua ua falepuipui e lei maua i ai se faamatalaga poo le ā le taunuuga i se finagalo o le nuu.
