Suipi Manaia Events e tapena tauvaga tausala o Samoa

O tausaga ua mavae sa tuuina atu ai i le aufaipisinisi latou te tapena ma faatino tauvaga sa sailia ai se tamaitai e avea ma tausala o Samoa, sa iai faaletonu sa aafia ai ona sa lilifa tapenaga i le taumafai o i latou sa nafa ma lea tauvaga e saili se tamaitai e lē gata ina lalelei ae siamu pe lelei atoatoa i le gagana Samoa.
Peitai na faaalia e le Palemia susuga Tuilaepa L Sailele Malielegaoi i le feiloaiga ma tusitala, na te manatua le tausaga e 1995 a o avea ma Minisita o tulisi, sa auai i le tauvaga o le tausala o le Pasefika sa faia i Tonga.
O le mea na tupu, na oo i le taimi na fai ai fesili i le gagana peletania, na alu atu le fesili i le Tausala o Samoa ae sau le tali, e lē tutusa ma le fesili. Fai mai le Palemia o le mafuaaga ona ua masani le tamaitai sa avea ma tausala i le taliina o fesili i le gagana Samoa ae oo atu loa ina faapeletania ua faaletonu ona e lē lelei le nanu.
O le mafuaaga lea na ta‘ua e le Palemia na faatino ai loa e le Malo tapenaga ma faatino le tauvaga o le sailia o se tausala o le atunuu. Na sosoo ai ma manumalo o Samoa i le tausala o le Pasefika ona ua sui le faamuamua na ave i le sailia o se tausala o Samoa.
O lea la ua toe faia le iuga a le Malo e toe lafo i tua i le aufaipisinisi le tapenaina ma le faatinoga o le tauvaga e pei ona manumalo le ofo a le Manaia Events o loo avea ai se tasi o alii loia ma faatonu, ae o se tasi foi o loo pulea ma faagaioia le faletalimalo o le Orator i Tanumapua le susuga Leiataualesa Taii Jerry Brunt.  I se talanoaga ma le faatonu o le Manaia Events i le po o le Aso Sa na tea nei na ia faailoa mai ai, ua amata nei ona tatala faitotoa mo le lesitala atu o tamaitai e fia tauva.
Ua ia faailoa mai foi ua oo atu lagona fiafia o nisi i Niu Sila ma Ausetalia faapea totonu lava o le atunuu ona o le suiga ua iai le tauvaga. O le a tumau pea ona umia e le Malo o sana meatotino le tauvaga lenei seia vagana le faagaioia ma le pulea atoa o le tauvaga ua faamatuu i tua.
O se suiga o le tauvaga o lenei tausaga na faaalia e Leiataualesa o le vaiaso atoa o le pre pageant o le a auai tamaitai tauva uma, a o lumanai ai le vaiaso o le Teuila lea e taualuga i le tauvaga o le sailia o se tausala o le atunuu.
O seleni uma e maua mai i le faatautaiga o le tauvaga o le a avea o se meatotino a le Manaia Events. Ua tapena foi e lea kamupani le tauvaga mo le tausaga fou ae e lē o iloa pe fia ni tausaga o le a faatino ai e lea kamupani le tauvaga.