Faigofie ona feiloai ae faigata ona tetea ma faamavae….
O le feofoofotaiga o lagona ma manatu o aiga sa valavala i le tele o tausaga, o se faafetai lea i le Atua ua tau lau o le faamoemoe.
O lupe sa vao eseese a ua fuifui faatasi. E moni ai le faisalamo, “Ua tala mai e le lagi le mamalu o le Atua, ua faaalia foi e le vanimonimo galuega a Ona aao.” Ana lē seanoa le alofa o Ieova semanu e lē feiloai ma sagisagi fiafia.
O le tāua o le tuufaatasia o aiga ma fai mafutaga faapea, ina ia faamasani alo ma fanau na soifua a‘e i totonu o nei atunuu. E tele lava itu lelei alagatatau ai nei foi mafutaga, auā e lē gata e puipuia mai ai le toe fenofoa‘i o tamaiti, ae faapea foi ona faamasani ai, a o iai ni mea e tutupu mai, a o loo iloa ane e le isi tagata o ona ia lava ivi, toto ma aano.
O le Aso Faraile aso 3 o Oketopa na amataina ai le mafutaga a le aiga Sa Naeā mai le alalafaga o Eva i Anoamaa lea sa potopoto ai aiga i Gold Coast.
Sa matuai matagofie lea faatasiga auā na auai mai le Sa‘o o le Aiga le afioga ia Naea Ami Teuane mai Samoa faapea le aumalaga toatele e toaluasefulu mai Samoa, ae ese ai i latou na malaga mai Niu Sila, Amerika faapea nisi setete o Ausetalia.
E 4 aso o le Mafutaga ae na faamae‘aina i le Aso Gafua, Aso Malolo a Ausetalia. O le afioga i le aloalii ia Galumalemana Naea Tagaloa Harrry Timoteo o le Peresetene o le Mafutaga a Brisbane, Failautusi o Uila Naea, Teutupe o Naea Amby faatasi ai ma le faletua ia ia Sarai Tu‘ifao, o ia o le faufautua.
Na ta‘ua e le taitaifono e maua le 200 ma ona tupu o i latou sa faatasi atu i le mafutaga e aofia ai ma tamaiti. O le ‘auga o lea mafutaga ina ia faamasani alo ma fanau a le Aiga o Sa Naea o loo ta‘ape ma salalau i atunuu i fafo.
E tele faagaioiga e pei o taaloga ma sauniga lotu faapea talatalanoaga ma o se avanoa faaauro faagalo gata i le taimi na toe faamavae ai ma luluaao ua faamavae Mafutaga ma aiga.
