O se tasi lenei o alii taalo lauiloa ua tele ina afea i tusitusiga a le au tusitala i lona lumanai o loo i taaloga ma le talenia o lenei alii i le Kalapi League faapea foi le Lakapi Iuni.
Ina ua lamalama faaiu le taamilosaga o le Super 15 o le taimi tonu foi lea na toe laga ai i talanoaga le filifilia o lenei alii e malaga faatasi ma le All Blacks i le faaiuga o le tausaga. Sa tele ina toe fesiligia le faigofie ona ofi i totonu o lenei alii ae faapefea le toatele o isi tama taaalo.
Sa faapea foi ona fesouaina le faaiuga ina ua toe laga foi le agavaa o nisi ua silia ma le 18 masina e lē o toe filifilia e le Au tele a Niu Sila, i le taimi tonu lea ua agavaa ai foi Sonny Bill Williams le isi alii taalo o loo matala i ai le faitotoa e filifili ai mo Niu Sila poo Samoa foi, peitai ane na manino lona toe fia foi e taalo mo le All Blacks.
O se tasi o lagona faaalia e Sonny Bill Williams lona fiafiaga tele ina ua tasi le filifiliga e toe foi e taalo mo Counties i lalo o le alii faiaoga ia Tana Umaga. O loo iai lona faatuatuaga e toe fesoasoani malosi e toe fafagu le tulaga o le lakapi o loo ia naunau i ai.
Na lei toe faatali Sonny ina ua taunuu mai i Niu Sila ae amata koleni faatasi ananafi faatasi ma le Au a Counties Manukau, faamoemoe mo le la taaloga i le Aso Lulu nei ma Aukilani i Pukekohe.
Ua pei ua toe feiloai le tama ma lana uo, ua silia i le 6 tausaga o valavala mai le taimi muamua na taalo ai i Falani i lalo o le taitaiga a Tana Umaga a o faiaoga Umaga i le kalapu lakapi a le Toulon i Falani.
O loo faafetaia e Sonny Bill Williams le tulaga o loo fesoasoani faapitoa ai Tana Umaga i lana taaloga, ma ua ia sauni ma le atoatoa e faatino le avanoa e ono filifilia ai mo taaloga sosoo e lua lea o lea sosoo ai nei o le ITM CUP i lenei taimi, aemaise ai lava le 15 o alii taaalo i le Au.
O Sonny o se alii talavou ua na o le 29 tausaga o lona matua, e lē o popole tele lenei aliii i le tulaga i le fesuiaiga mai le taaloga 15 i le taimi nei, e fua i ni avanoa na muai maua e iloa ai ona faatinoina ai le taaaloga.
Talosia e filifilia e Umaga lenei alii o Sonny e taaalo i le Aso Lulu nei i le taaloga ma Aukilani, faapea ai foi isi taaloga o le ITM Cup, se‘i toe silasila ai le atunuu ma le lalolagi i taleni o loo i lenei alii taalo.
E talitonu foi o se fiafiaga tele foi lenei ia Tana Umaga na te toe tapena ai lenei alii mo le avanoa i le Au tele a Niu Sila. Talosia ia filifilia Sonny mo le taaloga i le Aso Lulu nei.
