O le amataga o lenei tausaga na faailoa mai ai e le susuga ia Sulu Paeaia lona umia o ni tusipasi e ala i ana galuega o loo faatinoina i totonu o lenei atunuu, o nei tusipasi ua maitauina ai lona faatinoina o ni galuega i totonu o maota ma laoa i lalo o lana kamupani ua uma ona resitalaina i le malo ua faaigoina o le Expert Tiling & Stone Co Ltd.
O lenei tamalii o le atunuu ua ia mafai ona pulea ma taitaiina lenei kamupani e ala i le faapiipiina ma fola tiles o fale taele, wall o le fale, floor, sitepu o fale, faapea galuega i fafo swimming pool ma le faiga o waterproof.
E tolu tausaga na sueina ai e le susuga ia Sulu ana tusipasi ma faamanuiaina ai, ae ua lima nei tausaga talu ona ia umia. Sa ia galue i lalo o se tasi o kamupani ua faaigoina o le Epert Tiling & Malsonry i le tolu tausaga.
A o ia galue ai i lalo o le faamalu o lenei kamupani, na ia vaavaai mamao ai i se isi laasaga fou mo ia lava aemaise o lona aiga, ae faapea foi le faaaogāina o le meaalofa ma le tomai ua tuuina e le Atua ia te ia e ala i lenei galeuga, ae lē gata i lea o lona taumafai ia maua se faamāmā avega mo tagata o lona atunuu.
O le fiafiaga sili i lona loto ua tau lau o lona faamoemoe ma lana moemitiga, ua ia puleaina le kamupani e fesoasoani ai i tagata i le gagana Samoa aemaise o le fesasoani i tagata i se tau e talafeagai ma le taugata o le soifuaga ua iai. Ua tolu nei tausaga talu ona ia taitaiina lana kamupani.
O se tasi o fale i Dominion Road o loo galue ai nei le susuga ia Sulu i le faapipiina o tiles o le wall o le faletaele faapea ma le floor, faatasi ai ma le wall o le umukuka. Ae o loo iai isi ana galuega o loo faatali pe a mae‘a le maota o loo ia faatinoina.
O se isi vaega o lana galuega o lona siakiina uma lea o vaega o loo galue ai ona ia faatumuina lea form ma lafo i le Council auā le faamaoniaina o galuega e aunoa ma le toe siaki e le Council. O Sulu e sau mai le afioga o Saleaula i Savaii.
