O le vaiaso na tuanai sa faatumulia ai aiga uo ma ē masani i toe sauniga o le tina ia Robyn Sybil Mackay Ainu‘u, le faletua o le alii o James Ainu‘u o Sapapalii ma Vaipua le alo e faasino i le tina ia Ualesi faapea le faifeau ia Mali’oli’oao Ainu‘u Sekai.
O le tina ia Robyn na vaaia ma ootia ai foi Ausetalia lautele i luga o le televise, leitio ma nusipepa ina ua maliu ai lava i se faalavelave tau taavale i luga o le auala o Windsor i Sini Sisifo i le taimi pisi o le tuua o aoga a le fanau.
O le taimi lea sa faatino ai lana tautua i le galuega sa galue ai e fesoasoani i fanau e iai o latou manaoga faapitoa i le tino ma le mafaufau. O se tina e lē malolo mai ona tiute fesoasoani ma le loto alofa mai lava i totonu o lo latou aiga seia oo i le galuega. O le sauniga na taitai e Rev Aloese Filipaina ae fesoasoani ai Ps Siaosi T. Kamuta. I se molimau a lona toalua le susuga James Ainu‘u, “O le a matuā misia lava oe le toalua pele, e lē gata i le ta mafutaga ma le fanau ma mātua aemaise lava i ou uiga tausaafia.”
O lea lava aso na matuā faatumulia ai le malumalu Papatiso i St Mary’s i uo mai lana galuega aemaise aiga na masii mai setete o Ausetalia aemaise Niu Sila faapei o le tina ia Maligi Mackay o Tufuiopa, Solosolo ma Saipipi. “O le taimi mulimuli lava na ma talanoa ai ma si a‘u tama o lana tala fiafia atu i lana galuega fou ua amata ai nei, ae peitai ina ua maua le tala faavauvau e faafetaia pea le Atua ona ua vave maua se malologa a Robyn mai ona manu‘aga tuga mai le faalavelave nai lo le tigaina umi.”
I se ripoti a leoleo ma le falemai o le taimi pisi i le auala na faafuasei ai ona afaina le taavale a Robyn ma se tasi o teineitiiti sulufai i se loli ma maliu ai lava ae ua sologa manuia le pasese na la toalua i lenei faalavelave.
I le molimau a le faifeau na galue ai Robyn o ia foi o le tuaa o James Ainu‘u ia Ps Mali’oli’oao Ainu‘u Sekai, “O se taimi aupito sili lenei ona faigata mo ia ma si o latou aiga aemaise lava si atalii ia James ma le fanau ia Lamar faapea le teine ia Chloe ona o le soifua ua amia o le tina ia Robyn, o se afafine galue malosi ma tausi aiga lelei ma ou te lē iloa pe malolo si o‘u afafine.” O alofaaga foi nei mai tuafāfine o James ia Helen faapea Mate.
“E ui na fanau ma soifua Robyn i Niu Sila ma faaipoipo ai ma James i le 1987 ae valaau le alii mo ia ua atoatoa uma lona tomai i le fatuaiga ma le tausi aiga lelei i lana tu, savali ma le tautala, o se mitamitaga faia‘e i lo matou aiga atoa.”
I totonu o le matou aiga e vaaia pea le tu malosi i ona tiute tauave faapea foi i totonu o le lotu. I ona tiute faatina i lo la va ma lona toalua e tausisi lava ia i le soifua maloloina o James ma o se tina e loto alofa. Tau ina ia maua sou nofoaga mau i le Lagi Robyn.”
O le mau foi lea a le alo tamaitai ia Chloe Ainu‘u i si ona tina. “O le a misia lava oe Mom i le tatou aiga ma e lē faagaloina lou alofa ma lou agalelei.” Sa lē mafai na faaauau lana molimau i le ootia tele o le afafine ia Chloe.
Na taualuga foi le aso o Robyn i se taumafataga na saunia lava e aiga ma faatino ai foi faaaloaloga masani e pei ona molimoli e le fetalaiga ia Manu Seiuli Kalifa Fualau faapea le Tofa Seiuli Liuliu.
Na mataina foi se pese na usuina e fanau a fanau a tausoga a Robyn mai Niu Sila. E lē gata i lea o alofaaga mai nisi o aiga ua lē paau mai e aofia ai le alii pese lauiloa o le SOLE MIO ia Moses Mackay o loo faamautu i Europa.
