Ua iite fanua a lalo ma ua mae‘a ona faamautu tapenaga ale Mafutaga e pei ona malaga mai ai le faafeagaiga mai Samoa, le susuga ia Rev Uilipifosi Konelio Teo faapea sui ole alalafaga ae tainane le sa‘ofetalai ia Laga‘aia Tapuni ma Laga‘aia Komi male aumalaga.
Oloo vaaia le lagolago a nisi o tamafanau faapea paolo ma gafa ae tainane o lupe faalele ale alalafaga e ala ile faamoemoe oloo loloma nei. Ole tusi lenei oloo faatalauula ai le Mafutaga i aiga ma uo faapea Samoa mose lagolago auā le faamoemoe. Ile agaga maualalo male faaaloalo tele, e valuvalusia ai aa ole laau ma talo atu ile paia male mamalu ole toto salalau o Fa‘ala o ta‘ape i Brisbane faapea paolo ma gafa e malu ai lenei nuu, uo ma ē masani, faamolemole afifio ma talaaao mai tatou pulupululima faatasi e māmā ai le tatou galuega auā le faatalauula a lea foi tovine oloo i totonu osi o tatou nuu i Samoa. Ole Isaraelu moni lava ia e susue lona faamalama ma tepa a‘e i lona nuu. Ua laasia ai vasa e tele e lenei Ekalesia EFKS mai Samoa ona ua lima vaivai, ma e taliaina male loto faafetai soo se taulaga tupe e te tau’aaoina auā le faamoemoe ile fia fausiaina ole maota ole galuega EFKS i Samoa.
Ole Peresetene ole Mafutaga a Fa‘ala i Brisbane – Afioga ia Laulu Pelepesite Ah See, Sui Taitaifono Tui Alatina Vaimoso, Teu oloa Papaliitele Faye Faleolo Wright, Failautusi Seiuli Notise Tui Eti.
Ole faamoemoe ole a faataunuuina ile Aso Toonai 10 Setema 2016, ile Tiafau Hall (EFKS Southwes Brisbane) 228 Learoyd Road, Willawong QLD 4110.
Polokalame ole Aso: Aso Toonai aso 10 o Setema 2016, ole 10am e amata ai ile saunoga lotu ona sosoo ai lea male malutaeao, ma faasolo ai loa ipu e pei o tulaga masani ai aso faapenei.
Ole itula e 1pm ole taumafataga ole aoaluli. Ua iai le faamoemoe ole itula e 3pm ole a tauaao ai se faigameaalofa ale faigamalaga mai Samoa, mole mamalu ole atunuu ole a faatasi atu. Ole Aso Toonai ua tuanai na toe taliu atu ai i Samoa le susuga ile faafeagaiga e tu‘i mai le mulipapaga ae ua mae‘a ona tuuina lana faamanuia ile Mafutaga a Fa‘ala faapea sui mai Samoa ina ia faatasi le Atua ia auomanū ai le faamoemoe e ala ile sailiga seleni.
