Ile tolu vaiaso talu ai na fofogaina ai i luga ole tautua leitio ale Apu FM ile aai o Melepone le faatalanoaga male tamalii pese o Sive Vaiga Ualesi lea ua faitau vaiaso o faaopea ile aai ona o sailiga malo male faafiafiaina ole atunuu i lana taleni.
Na ia saunoa ai ole a faia faapitoa sana meaalofa mo tamā uma lava ile aai o Melepone aemaise soo se tafa ole lalolagai ole a oo atu iai lana pese ise taimi mulimui ane, o lenei pese na ia fatuina faapitoa lava i lona faatoa taunuu ile aai ma mautinoa ai e eseese aso e faamanatuina ai Aso Sa mo tamā i Samoa ma Ausetalia.
Na mae‘a tuufaatasia le pese lea ua faaigoaina, “E faaputuoa Tamā mo le fanau” ma pueina ai lava ile pitonuu o Dandenong e se tasi foi o tamalii Samoa oloo tautua i lea foi taleni.
Na mafai ona faafofoga le atunuu i sina vaega ole pese i luga ole tautua ale leitio ile Aso Gafua na tuanai atu, peitai ole atoaga ole meaalofa na faatoa fofogaina ma tuuina atu loa, o lana meaalofa faapitoa mo tamā uma i lana koneseti faapitoa sa faia ile Aso Faraile na tuanai atu ile pitonuu o Broadmeadows.
E lē gata i lona fofogaina ole pese, ae na ia fai meaalofa ai foi i tamā e toa selau muamua na afifio atu i lea afiafi ile CD ua uma ona pueina iai le pese lava lea mole Aso Sa faapitoa o tamā e pei ona faamanatuina ile Aso Sa na tuanai atu.
Na fesiligia nisi o tamalii ma tuaa sinasina na talaaao atu ile faamoemoe ma o latou saunoa ai, e tāua ma logomalie le pese aemaise lava ina ua maua tonu le aano moni o mafaufauga ma fatuga ale atalii ile mae‘a ai ole usuina faatolu pe faafā, aua na lē uma le molimanao ole toatele o tamā ina ia toe usuina le pese faapitoa lea.
O nisi foi o tamā na faamatala ma loimata ona o nai o latou tuaa ua fai i lagi le folauga, ae ua manatua pelega ma momoli ai foi ma alofaaga mo i latou ile pese a Sive. Manaia ma matagofie le Aso Sa o Tamā ile aai o Melepone ile lagolago a lenei tamalii pese.
