O le faamoemoe sa nofo tatalo ai le mamalu o le Ekalesia i ona vaega eseese, ina ia faataunuuina ma le manuia, ma ia aogā mo le tupulaga talavou lalovaoa o Samoa o nopiai ma saili malo i le aai o Melepone, aemaise lava le Atua ma lona finagalo i soo se Ekalesia o le Tovine Paia a le Atua, ma o le afiafi o le Aso Faraile na tuanai atu, aso 7 o Tesema, na faataunuuina ai lea faamoemoe o le Autalavou a le Ekalesia a le Worship Centre a St Albans i le aai o Melepone.
O le susuga i le faafeagaiga taulagi ia Atapana Ete ma le faletua o loo tausia le Ekalesia, na faatumulia le faamoemoe o le autalavou i autalavou mai Ekalesia eseese aemaise o susuga i faafeagaiga taulagi ma o latou faletua na talaaao atu e faaalia le agaga lagolago e ala i aitema ma pesepesega faaleagaga na faatinoina.
Molimau nisi o le mamalu o le atunuu, o faafiafiaga ma pesepesega uma a autalavou taitasi na matagofie uma, ma na atili maualuga ai le viiga o le Tapaau o i le Lagi.
O le finagalo folafola o le Atua na laugaina e le susuga i le faafeagaiga ia Siagigi Vaafusuaga na malaga mai Samoa, o le Upu lava na fetaui lelei ma lava saunia e taoso ai le faigamalaga a alo ma fanau o le talalelei, a o sauni atu mo aso fiafia o le Kirisimasi ma le Tausaga Fou.
Na mae‘a le sauniga ona alo lea i le malu afiafi na saunia e le Ekalesia mo le valaaulia ma Samoa potopoto, ona faamanuia lea o le Aufaigaluega totofi a le Atua mo tupulaga talavou uma na aofia, ma taape fiafia ai ina ua maualuga le faaneetaga mo le suafa manumalo o Iesu Keriso le faaao o Ekalesia uma.
