O le Ekalesia Faapotopotoga a le Atua i New Lynn, o le tasi lea matagaluega toatele o loo iai i le itu i Sisifo o Aukilani. O loo tausi matagaluega ai le susuga i le faafeagaiga ia Lamositele Mao ma le faletua ia Lauesi Lamositele.
O le afiafi o le Aso Sa ua mavae 29 o Iuni sa faatinoina ai le polokalame a le autalavou, lea sa vaevaeina i vaega e tolu. O le mafutaga a tamā ua faaigoaina o Sakarata, o tina o Mesako ma le Autalavou ua faaigoaina ia Apeteniko, faatasi ai ma le mafutaga a le fanauiti sa faaigoa ia Lafu Mamoe Itiiti.
E fa vaega lautogia na togi agai i ai lenei faamoemoe. (1) Pese Akapela, (2) Mau Faitaga (3) Tala Faatino (4) Siva Faitaga faatasi ai ma Taaloga ma Taliga Fesili o le Tusi Paia. O le susuga i le Peresetene ia Raymon Vaafuti Maiava ma le failautusi ia Aperaamo Mai Vala sa laua fuafuaina lenei polokalame i totonu o le ono masina.
Na matuā faatumulia le malumalu i aiga faapea uso asiasi na auai atu e molimau le uluai polokalame a le autalavou i lenei tausaga. Sa faatasi atu ai foi le susuga i le faafeagaiga ia Gasologa Taala ma le faletua ia Lotofoa faapea le Ekalesia Faapotopotoga a le Atua i Manukau.
Na muamua lava i le taulaga faafetai i le Atua, ona sosoo lea ma le faamalosi na fofogaina e le susuga i le faafeagaiga ia Gasologa ma o laua foi ma lona faletua sa fai ma faamasino o le tauvaga.
O le mae‘a ai o le tauvaga na vaaia ai le lē manofonofo lelei o vaega taitasi i le faatalitali i le iuga ua oo i ai faaiuga a Faamasino. O le au a Sakarata na manumalo i le pese akapela, ma taaloga i le Tusi Paia, ae tutusa ma Mesako i le tulaga muamua i le tala faatino, o le ‘au foi a Mesako na tulaga muamua i le siva faitaga ma taliga fesili o le Tusi Paia ma le ‘au e lelei ana tapenaga.
O le ‘au o le Lafu Mamoe Itiiti na sola ma le ipu o le taulaga. A o le aotelega na siamupini ai le ‘au a le mafutaga a tina (Mesako) i le polokalame amata o lenei tausaga, ma ua iai le faamoemoe o le laulau o le a toe faia ia Tesema le isi CA i le faaiuga o le tausaga.
