Na lē ofi le fale faamasino i le faaiuga o le vaiaso ina ua tolaulauina le iuga a le Faamasinoga i le alii ua lauiloa i le taaloga lakapi i Samoa ma atunuu mamao, le Afioga Muliagatele Brian Lima. O se mataupu ua aumasinā talu ona toso mai ae o lea ua faamae‘a i le vaiaso na tea nei.
E lima moliaga faasaga ia Muliagatele, e aofia ai le faaoo manu‘a e lua moliaga na aafia ai faasaga i le tamaitai na la nonofo, le afioga Lemalu Sina Retzlaff.
O le moliaga o le togi o se meafaitino o se fagupia. O le moliaga o le umia o se aupega o le fagu pia, ma le moliaga o le fai o ni faamatalaga tau faamata‘u. Na teena e lenei alii ia moliaga ma o le tamaitai loia ia Ruby Drake na tulai mo Muliagatele i lenei faamasinoga.
O le faaiuga o le tausaga na tea nei ina ua agai mai i fafo Muliagatele mai i se tasi o fale faafiafia i Matautu i Apia ae fetaui ai ma le tamaita’i o Lemalu Sina ma sana uo.
Na faafeiloai e Lemalu Sina Muliagatele i lana uo lea ma o iina na tulai mai ai loa se feeseeseaiga lea na ta‘ua e leoleo na vevesi ai ma mafua ai moliaga ia na faia faasaga ia Muliagatele.
O se mataupu na soo le lalolagi o faasalalau ai ona o foliga o le afioga Lemalu na vaaia le afaina tele i lenei vevesi. Sa faaauau foi ona faatalatalanoa lenei mataupu o sauaga faasaga i tamaitai i lenei tausaga, ona o le popolega lea o le tulaga o lenei alii ua iloga ia Samoa ma le lalolagi atoa, ae o lea ua ia faia lenei osofaiga faapea.
Na teena e Muliagatele lona faaoolima ia Lemalu ma le faamatalaga o le tu‘i na fuafua mo le uo a lē sa la nonofo, ae na oso ane Lemalu ma faalavelave ma aafia ai loa. E eseese lava itu i lenei mataupu ae o le faamuamua na ave e le Faamasinoga i le taofi o sauaga i totonu o aiga, ma o le tolaulauina o le iuga a le afioga i le Faamasino ia Ida Malosi na ia toe ave ai le faamamafa i le taumafai o Samoa e taofi ma tafiesea sauaga faapenei ua aafia ai tina ma fanau.
O le talosaga a le Itu a Leoleo ina ia ave se faasalaga faafalepuipui e tuli e Muliagatele ina ia avea ma aoaiga ia te ia ma isi alii o le atunuu, peitai o le aso o le lauina o le iuga na tulai ai lē na tagi, le tamaitai ia Lemalu Sina Retzlaff ma faapea mai, o lana talosaga ua fai i lea aso ua fai e avea ai ma sui o le la fanau ma Muliagatele, ina ia alofa le faamasinoga e taofi se fuafuaga o se faasalaga faafalepuipui ona o le aafiaga o le fanau i se faaiuga faapea.
O le talosaga a le loia ia Ruby Drake na ia faapea mai ai, e silasila le faamasinoga i le aafiaga o tofiga o lenei foi alii i le taaloga o le lakapi i Samoa ma ia lē gata ina taofi se faasalaga faafalepuipui ae o le faalēaogā o lenei moliaga ua faamaonia faasaga ia te ia.
O le tali a le afioga ia Ida Malosi na ia ta‘ua ai, e lē mafai e le faamasinoga ona fulitua i le ogaoga o le faaoogalima aemaise le unai ina ia taofi nei ituaiga sauaga, ma e faamaonia lava tuua‘iga ua faia faasaga i lenei alii.
O le faaiuga la a le tamaitai faamasino, o le nofo vaavaaia lea o Muliagatele mo tausaga e lua ae ua faatonuina o ia ina ia vaai se fesoasoani faalemafaufau e faatalatalanoa lenei faafitauli ua feagai pea ma ia, ina ia aua ne‘i toe tulai mai ma ia mafai ona taofiofi lona ita.
O se faaiuga ua vaeluaina ai foi le atunuu, auā o nisi sa iai lava le manatu e tatau ona iai se aoaiga e faia ia Muliagatele ina ia aua ne‘i iai le manatu e lē mafai lava ona taofia faafalepuipui pe a toe tulai mai nisi osofaiga faapea, ae o le isi toatele ua iai le manatu o lea ua ave e le faamasinoga le avanoa e mafai ai loa ona agai sa‘o Muliagatele e maua se fesoasoani i le taofiofi ai o le ita ma vave ona oso e osofai tagata ma ia manatua e lē o le malae lakapi lea e fai ai nei ituaiga gaioiga, ae o lona aiga ma tagata e tatau ona ia puipui i ai ae lē o le osofai.
O le faamatalaga a le tamaitai faamasino, o le faamasinoga e lē o se faamasinoga o ni finagalo faaalia (court of public opinion) ae o le faamasinoga faaletulafono (court of law) ma e lē talitonu o se faasalaga faafalepuipui o se tali talafeagai lea mo Muliagatele.
O lana faamatalaga foi na fautuaina ai aiga o itu e lua e tuu Lemalu Sina ma Muliagatele Brian e faatautaia e i laua le la ulugalii ae lē o le aiāina e aiga na lua e ui ina ia ave le faaaloalo i itu e lua o lea mataupu.
O le faamatalaga a Muliagatele e iai le taimi e taloina ai tusitala i sana faamatalaga aloaia i lenei mataupu ae na ia faafetaia i latou uma na tapuaia lenei faamasinoga.
O le taimi lenei, na faamavae lenei alii ma see ese mai i ona tofiga faafaiaoga a le Iuni Lakapi a Samoa se‘i tālia ai le faagasologa o lenei mataupu.
