Na autovaa mamao mai Samoa le tausi Matagaluega a Manono le susuga i le Faafeagaiga, Rev Vaatofu Tala ma le komiti tumau poo le tiakono toeaina o Faasagone Eteuati mo se fesoasoani e faamae‘a ai le hall a le Ekalesia Metotisi i Faleū Manono.
Na talisapaia e le mafutaga a alo ma fanau a Manono le faatagisia o se seleni, e ala i le po siva na faataunuuina i le Aso Toonai na tea i le nofoaga tutotonu o le aai i St Clair.
O le faatamā o le mafutaga le susuga ia Rev Laau Aumua, o ia foi o le failautusi a le Sinoti o Sini ma le faletua ia Elisapeta na faamalosiau i le galuega fita na nafa ma le komiti faafoe i ona tapenaga eseese.
Mai le matagofie o le togiga, ma le tele naunau o taumafa, aemaise le tautuaina o le mamalu lasilasi o si o tatou atunuu, lea na vaavaalua faa-Samaria ma le mafutaga, e ala i le aao mafola.
O le nofoa laulau o loo faafoeina lenei mafutaga a alo ma fanau a Manono o loo alaala ma papaaao i Ausetalia mo lenei tausaga – Taitaifono: Leiataua Leiataua, Aao Tusitusi: Faleupolu Talalelei, Teu Oloa: Rev Faletagaloa Mapusone (Melbourne).
E sefulutolu (13) matafale na pulupululima e opogi lenei faamoemoe, ma e tusa o le 2007 na faavaeina ai lenei mafutaga, o se faamatalaga lea na tuuina mai e le faletua ia Elisapeta.
Ua fetaiai i magafetau soifua, ona o le faamalumaluga a le Tamā o i le lagi, ona a aunoa ma lona alofa e lē ogatasi foi le futia ma le umele.
Na faatomua viiga ma faafetai faalēlava, ona alo atu lea o le afioga i le fofoga o le aso, Puleitū Samuelu e fofogaina sausaunoaga eseese, lea na uluai tatalaina e le afioga i le Sea o le Sinoti, Rev Halefoti Seloti.
E lē gata i lea, ae soo se faamoemoe faapenei e faasino tonu i le Ekalesia Metotisi, e matuā masii atoa mai tausi matagaluega ma o latou faletua mai ona aai ma itumalo eseese, e lagolagoina.
E pei ona auai atu Rev Faagū Toomalatai mai Penrith, Rev Gagai Uelese mai Sini, Rev Elifasa Vaituutuu mai Fairfield, Rev Tanifa Maiava Bonnyrigg, Rev Soti Soti Bankstown, Rev Ropeti Enoka Macquarie Fields, Rev Esau Tuisalena Malolo.
Ua pati taoto le tapuaiga a alo ma fanau a Manono, ona ua soosoo tau‘au ma aiga, uo ma ē masani, lea na tauaaoina ai e le malaga mai Samoa, le foai alofa e $50,500, ua faamae‘aina atoa ai aitalafu mo le hall, a le Ekalesia Metotisi i Faleū Manono.
Na fofoga taumomoli le komiti tumau mai Samoa, Faasagone Eteuati ona ua matuā faagaeetia i le talisapaia, ma le saili malo o le mafutaga i Ausetalia nei, lea o le a taliu i fanua, ona ua tau lau o le faamoemoe.
Na molimauina le mauoloa o le mafutaga i measina a le atunuu, lea na faasoasoa e le afioga i le malo toga o Faasou Aita Faasou, e pei o tu ma agaifanua o faaaloaloga, e toe taui ai le alofa.
Faapei Samoa e, o au upu masani, o le sulu mu tele e maua ai figota, o le felagolagomai e maua ai ni iuga lelei, auā e sili lava le manuia o le na te foai.
