O le atoa ai o le 80 tausaga, o se meaalofa mai le Atua mo le Aso o Tina i lenei tausaga 2011. E leai se mea e sili atu nai lo le mafai ona toe feiloai ma silasila i le tina ia Ana Enesa Nifo, ina ua atoa le 80 tausaga o lona soifuaga a o vaaia pea le malosi ma le maloloina o lona tino ma le mafaufau.
O le agaga lea ma finagalo faatasi ai ma talotaloga a alo o le tina ia Ana, faapea le mamalu o aiga na lua, aemaise ai o fanau o ana fanau, ina ua faatasitasi ma feofoofoai i le faamanatuina o le atoaga o le 80 tausaga o le tina, sa faamanatuina i le Aso Toonai, aso 7 o Me 2011.
O le sauniga o le faamanatuga o le aso soifua sa taitai e le susuga i le Epikopo, susuga Lealaiauloto Kuini Matamua. O se tasi lava o aloalii o le tina, le afioga Tuiafutea Pe‘a Leaso sa faatautaia le aso, auā le mamalu i valaaulia ma aiga sa molimauina le aso o le tina.
O nisi o alo o le tina e alaala i Ausetalia, peitai na malaga mai lava ona o le alofa moni ma le fiafiaga i le faamanatuina o le aso faapitoa mo ia. Sa faatumulia foi le auvalaaulia, ma aiga e molimauina le alofa faaali o le Tamā i le Lagi, ma lana meaalofa faaopoopo pea i aso ma tausaga o le tina ma lona soifua.
O moomooga o le loto, ma alofaaga molipo mo le tina ina ia toe faaopoopo e le Atua nisi aso se tele i lona soifua. O le faafetai foi faapitoa i le Atua, ona o le mafai ona toe taitai ma aulia mai lona aso soifua, a o lumanai ai le aso faapitoa mo tina. Ia manuia lava lou aso soifua, ma ia faamanuia atu i lou aulia mai o le Aso Sa o Tina!
