“E moomia Oe auā se Pine a Samoa” – Olimipeka
“E tatala atu le avanoa i soo se Samoa lava i Ausetalia ma le lalolagi e agavaa i le siisii poo se isi lava taaloga e ono maua ai se pine a Samoa, afifio mai tatou toe taumafai mo le Olimipeka 2016.”
O se saunoaga lenei a le Afioga Tuaopepe Jerry Wallwork ina ua lē manuia le taumafaiga a Ele Opeloge auā se pine muamua a Samoa i le Olimipeka ua mae‘a. O lenei talanoaga ma Tuaopepe na faia i luga o le Samoa Sportstar FM89.3 i Sini nei.
Na tulaga ono Ele mai le tuuaofaiga o sui tauva e to‘a sefulufa e ui o lana sii masani na ono ausia ai le tulaga tolu ma le fa. Na saunoa Tuaopepe e le gata o le aafiaga o Ele mai le ‘tanesusu’ ma le fulū i taimi o tapenaga, ae o le matuā siitia maualuga lava o le sii a le tamaitai Saina ma le Rusia na ausia le auro ma le siliva.
E tele tausaga o suipi Tuaopepe ma le ausii uamea mamafa a Samoa i pine auro o taaloga a le Pasefika, Oceania ma le Commonwealth, ae peitai ua lē tau lau o le Faamoemoe i Lonetona.
Saunoa Tuaopepe o le toe ausia e Ele o le isi Faagatama i Brazil i le 2016 e i luga lava o le alo iloga o Samoa i ana toe tapenapenaga auā o se luitau fita. E le gata o le faalogoina pea o le fia tausinio ma toleniga faalua i aso taitasi mo le isi fa tausaga.
Sa fesiligia pe mata e maua se pine a Ele pe ana koleni faapitoa i Saina lea ua tele na faipaaga ma Samoa i lenei vaitau? “O le manatu lena sa iai ae peitai o le taugata o polokalame faapenei aemaise o le manatu ma le misia e sui o Samoa o latou aiga ma uo.”
Sa tali foi Tuaopepe, “O loo tatala atu lava le avanoa i soo se Samoa o loo iai le taleni e ono ausia ai se tatou pine o loo taalo ma aumau i atunuu mamao.” O le eseesega lava o le tamaoaiga ma nofoaga faaneionapo o loo maua i fafo e pei o le AIS i Canberra Ausetalia. O lenei avanoa na tatala mai lava i tausaga ua tea.
O le tausaga 2003 na faatuina ai e George Lealiifano le matatia a le lalolagi i taaloga a le Pasefika na faia i Suva, Fiti i le tauvaga Powerlifting. O le taimi muamua i taaloga a le Pasefika na ausia ai e se sui se matatia. E 14 tausaga o umia e se alii Rusia lenei rekoti na tata‘e e Lealiifano ma lauiloa ai le Pasefika.
Maimau pe ana faapea o se taaloga a le Olimipeka lea faagatama semanu ua leva na iai se tatou pine. O le susuga ia George Lealiifano mai afioaga o Magiagi, Poutasi ma Sataua na malaga mai lava i Amerika o loo aumau ai e fia tauva mo Samoa, e faapine ai lona taumafai maoae. O le taimi nei o loo aumau pea o ia ma lona aiga i Southbend, Indiana i Amerika.
O le tamaitai Samoa o loo taalo i le au Water Polo a Amerika ia Tumua Anae mai Leauvaa, Falelatai, Auasi ma Manu‘a, lea ua ausia foi le isi Pine auro ma lana au Water Polo i Lonetona. Ua iai nei lona suafa i le lisi o alo o Samoa e pei o Graig Louganis (diving) Robin Leamy (swimming) Eric Fonoimoana (beach Volleyball) ua pine auro ia latou faagatama i le Olimipeka.
Talosia ia ua lalata mai se taimi e manuia ai taumafaiga a le Team Samoa.
