Ua taatele le gaoi o tagata faigaluega mai i o latou fale faigaluega ma ua vaaia lava i le Faamasinoga i lea vaiaso ma lea vaiaso.
O i laua la na faasala i le falepuipui i le vaiaso ua tuanai, o nisi na galulue i se tasi o fale faafiafia i Vaitele, le Johnny’s Bar. E ono lelei masina o fai si a la amio o le se‘i i tupe maua a le fale kalapu ae faato‘ā maua ai loa.
O i laua ua falepuipui, sa faigaluega i le falekalapu o le Johnny’s Bar i Vaitele, ma molia faatasi ai i moliaga e 53 o le gaoi a o faigaluega i lea pisinisi. O i laua nei, o Sosefina Tamilo, 19 tausaga o Vaigaga ma Faitala Soonafai 38 tausaga o Vaigaga ma Vaitele Fou.
O Sosefina sa faigaluega o se tamaitai na te aoina tupe a tagata tafafao e afea lea falekalapu a o le alii o Faitala, o le leoleopo (security). E 53 taimi eseese sa gaoia ai e i laua nei tupe a le Johnny’s Bar ma e $10,600 tala se tinoitupe na aafia ai i nei soligatulafono.
E faapea se faamatalaga, o tupe e aoina mai i po sa faatino ai nei soligatulafono, e ave le isi seleni i le alii pule, ae vaevae ta‘i $200 tala ai i laua ua molia i le tupe e tuu ese.
O ia gaioiga sa fai e aunoa ma se silafia a le alii pule ae na alia‘e lea faaletonu ina ua ripotia e se tagata faigaluega o le falakalapu lenei, sa vaaia le toalua lea o loo fai ni faatauga tetele a o lei oo i aso e fai ai le totogi o le aufaigaluega.
Sa suesueina lea mataupu ma maua ai le faatinoga sa faia e i laua nei. E iai nisi o moliaga sa molia muamua ai le alii o Faitala ae e leai se piitaga i le moliaga fou lea ua molia ai i luma o le Faamasinoga, ae o le tamaitai o Sosefina, o le taimi muamua lea faato‘ā solitulafono ai.
Sa ioeina e i laua moliaga uma e faasaga ia i laua ma o le tinoitupe sa aafia i lea soligatulafono e lei mafai ona toe totogiina atu i le pule o le falekalapu.
O le soligatulafono lenei, ua matauina le toatele o le atunuu ua molia ai ma e le o ‘alo ai foi le Faamasinoga, i ana faaiuga fai ma faasalaga faafalepuipui e tuu ia i latou e faatinoina.
O se tasi foi lea o soligatulafono, e faamanatu ai lava le afioga i le alii Faamasino, Vui Clarence Nelson ia i latou e molia atu ai, ina ia mautinoa le sauni atu mo se faasalaga faafalepuipui.
E le gata i lea, o le lē ‘alo o faasalaga faafalepuipui, ina ia faailoa atu ai i soo se tasi o loo fuafua e faatino lea soligatulafono, o le tali lava a le faamasinoga o le falepuipui e tusa o le umi ua faatulagaina mo lea moliaga.
Mo le mataupu ua molia ai i laua na gaoi i le falekalapu o le Johnny’s Bar, e tai tasi ma le ‘afa tausaga (18 masina) a le tagata e nofosala ai i le toese i Tafaigata e tuli ai o la faasalaga.
